Пад Гроднам разбіраюць чыгуначныя шляхі, што вядуць у бок Літвы

• 29.05.2026, 21:22

Калісьці па гэтай ветцы можна было даехаць да Друскінінкая.

На Гродзеншчыне разбіраюць старыя чыгуначныя шляхі, паведамляе партал Newgrodno.by. Цяпер гэтая ветка ўжо не выкарыстоўваецца.

Гэты ўчастак чыгункі пралягае ад Парэчча да прыпыначнага пункта Учитель на мяжы з Літвой.

Калісьці гэтыя шляхі вялі да папулярнага літоўскага курорта — горада Друскінінкай.

Аднак у пачатку 2000-х гадоў міжнародны рух там спыніўся, а неўзабаве на суседняй тэрыторыі шляхі разабралі.

Прыгарадны дызель з Гродна да станцыі Учитель працягваў хадзіць яшчэ цэлых два дзесяцігоддзі. Цягнік з абласнога цэнтра адмянілі толькі ў 2021 годзе.

З таго часу руху па чыгуначнай ветцы не было. І толькі цяпер паступова здымаюць рэйкі і шпалы з беларускага боку.