Сёння Анджэй Пачобут атрымае Ордэн Белага Арла

• 3.05.2026, 9:36

Вышэйшую дзяржаўную ўзнагароду ўручыць прэзідэнт Польшчы ў Дзень Канстытуцыі.

Падчас нядзельных урачыстасцяў з нагоды Дня Канстытуцыі 3 мая ў Каралеўскім замку ў Варшаве нядаўна вызвалены з беларускай турмы журналіст Анджэй Пачобут атрымае з рук прэзідэнта Польшчы Ордэн Белага Арла, паведамляе Rzeczpospolita.

Рашэнне аб узнагароджанні Анджэя Пачобута Ордэнам Белага Арла прэзідэнт Польшчы Кароль Навроцкі прыняў яшчэ ў Дзень Незалежнасці, 11 лістапада 2025 года. Выступаючы на цырымоніі ўручэння ўзнагарод, ён выказаў надзею, што зможа асабіста ўручыць ордэн беларускаму журналісту і актывісту польскай меншасці ў Беларусі.

2 мая кіраўнік Канцылярыі прэзідэнта Польшчы Павел Шэфэрнакер паведаміў, што дзякуючы вызваленню Пачобута 28 красавіка гэта стане магчымым падчас святкавання Дня Канстытуцыі 3 мая ў Каралеўскім замку ў Варшаве. У гэты дзень Анджэй Пачобут атрымае з рук прэзідэнта Польшчы Кароля Навроцкага Ордэн Белага Арла.

Нагадаем, Анджэй Пачобут выйшаў на волю у выніку абмену на беларуска-польскай мяжы па формуле «пяць на пяць».

У лютым 2023 года суд у Гродне прысудзіў Анджэя Пачобута да 8 гадоў калоніі па артыкулах аб распальванні варожасці (частка 3 артыкула 130 КК) і закліках да дзеянняў, накіраваных на прычыненне шкоды нацыянальнай бяспецы (арт. 361-3 КК).

Анджэя некалькі разоў змяшчалі ў ПКТ у наваполацкай калоніі. У зняволенні ён моцна схуднеў, перанёс аперацыю па выдаленні язваў на скуры. У кастрычніку 2025 года ён завочна атрымаў Прэмію Сахарава, у лістападзе ён атрымаў вышэйшую ўзнагароду Польшчы — Ордэн Белага Арла.

У 2024 годзе Анджэй Пачобут стаў ганаровым грамадзянінам Варшавы.