Ракета Falcon 9 кампаніі SpaceX вывела на арбіту новы ваенны спадарожнік Польшчы

• 3.05.2026, 17:40

Спадарожнік палепшыць разведвальныя магчымасці краіны.

Новы ваенны спадарожнік Польшчы дасягнуў навакаляземнай арбіты ўранку 3 мая на борце ракеты Falcon 9 кампаніі SpaceX.

Пра гэта паведамляецца на сайце TVP World.

Спадарожнік для польскіх узброеных сіл быў пабудаваны польска-фінскай кампаніяй ICEYE. Гэта чацвёртая такая прылада Польшчы; яна прызначаная для ўзмацнення здольнасці Варшавы назіраць за Зямлёй як удзень, так і ўначы, а таксама пры неспрыяльным надвор'і, паведамляецца ў артыкуле.

Ракета са спадарожнікам пакінула касмічную базу Вандэнберг у Каліфорніі 3 мая незадоўга да 10:00 раніцы паводле мінскага часу. Усяго гэта ракета вывела 45 спадарожнікаў; пасля запуску кожнага з іх SpaceX падчас прамой трансляцыі абвяшчала яго назву і паведамляла, што «разгортванне пацверджана».

Міністр абароны Польшчы Уладзіслаў Косіняк-Камыш заявіў, што спадарожнік палепшыць разведвальныя магчымасці краіны.

«Мы будуем ваенную радыёлакацыйную групоўку POLSARIS, якая прадаставіць польскім узброеным сілам новыя магчымасці візуалізацыі Зямлі. Гэта забяспечвае адчувальную падтрымку аператыўным сілам і ўсёй сістэме нацыянальнай бяспекі», — напісаў ён на сваёй старонцы ў сацсетцы X.

Радыёлакацыйная групоўка POLSARIS выкарыстоўвае тэхналогію радыёлакадара з сінтэзаванай апертурай (SAR), якая дазваляе спадарожнікам атрымліваць выявы праз воблакі, дым і туман, у адрозненне ад стандартных аптычных сістэм.

Першы спадарожнік ICEYE для польскіх узброеных сіл — частка пагаднення аб супрацоўніцтве пад назвай MikroSAR — выйшаў на арбіту 28 лістапада 2025 года, а яшчэ два — у сакавіку 2026 года.

Місія SpaceX 3 мая таксама дапамагла вывесці на арбіту EYCORE-1 — спадарожнік варшаўскай польскай касмічнай кампаніі Eycore, якая спецыялізуецца на тэхналогіі радыёлакацыйнай візуалізацыі. Такія сістэмы выкарыстоўваюцца для ваеннага маніторынгу, аховы крытычнай інфраструктуры, адсочвання караблёў і ацэнкі шкоды пасля стыхійных бедстваў.