Улады Перу пачалі расследаванне вербоўкі Расіяй сваіх грамадзян на вайну
- 3.05.2026, 22:15
Крэмль накіроўвае перуанцаў на вайну супраць Украіны.
Пракуратура Перу пачала папярэдняе расследаванне з-за масавых зваротаў грамадзян адносна вербоўкі іх блізкіх на вайну супраць Украіны. Паводле звестак ведамства, перуанцаў заманвалі ў Расію прапановамі працы ахоўнікамі і на іншых пасадах, абяцаючы высокія заробкі, аднак пасля гэтага адпраўлялі на фронт.
Адвакат Марсэла Татахэ расказаў, што сем'і падманутых грамадзян падалі ўжо 135 заяў аб знікненні сваіх родзічаў, і ёсць звесткі яшчэ пра 250 падобных выпадкаў. Іншы адвакат Перы Салінас паведаміў, што ўсяго з Перу ў Расію з кастрычніка 2025 года выехалі каля 600 чалавек і як мінімум 13 загінулі на вайне з Украінай.
Паводле слоў адваката, сярод іншага рэкрутынгам займалася арганізацыя, зарэгістраваная ў Калумбіі. Некаторых перуанцаў запрашалі працаваць таксістамі, кухарамі або інжынерамі, абяцаючы заробак ад $2,6 да $4 тысяч у месяц і «вітальны бонус» у $20 тысяч, які яны ў выніку не атрымлівалі. Перад адлётам у Расію перуанцам давалі падпісаць дакументы на рускай мове, а па прыбыцці ў іх адбіралі пашпарт, накіроўвалі на палігон для кароткатэрміновай вайсковай падрыхтоўкі і затым вывозілі на перадавую.
Пракуратура кваліфікуе такія выпадкі вербоўкі як магчымыя злачынствы супраць чалавечай годнасці і гандаль людзьмі пры абцяжваючых абставінах. Улады краіны заклікалі грамадзян праяўляць асцярожнасць і не адгукацца на прапановы працы за мяжой без празрыстых умоў і пацверджаных гарантый.
МЗС Перу выклікаў часовага паверанага ў справах пасольства Расіі ў Ліме, а таксама запатрабаваў у Масквы інфармацыю пра месцазнаходжанне і стан здароўя суайчыннікаў. Ведамства падкрэсліла, што грамадзяне краіны абавязаныя атрымліваць дазвол уладаў для службы ў замежных узброеных сілах.
Пасольства РФ 30 красавіка апублікавала заяву, у якой прызнала ўдзел перуанцаў у вайне супраць Украіны. Пры гэтым дыпмісія сцвярджала, што яны падпісалі кантракт добраахвотна, і што ў Расіі «глыбока паважаюць рашэнне замежных грамадзянаў удзельнічаць у абароне свайго суверэнітэту і бяспекі».
У той жа дзень сваякі перуанцаў, якія апынуліся на вайне, правялі мітынг каля пасольства ў Ліме. Адна з удзельніц акцыі распавяла, што яе бацьку і яшчэ 25 ураджэнцаў краіны заманілі ў Расію пад выглядам турыстычнай паездкі і рыхтуюцца адправіць на фронт 15 мая.
Паводле The Telegraph, да канца 2025 года Расія завербавала на вайну каля 18 тысяч грамадзян з 128 краін Афрыкі, Азіі і Лацінскай Амерыкі, прынамсі 3,3 тысячы з іх былі забітыя ў баях. Выданне адзначала, што многія такія навабранцы гінуць у першыя 72 гадзіны пасля адпраўкі на фронт з-за адсутнасці належнай падрыхтоўкі і разумення таго, куды яны трапілі.
Шэраг дзяржаў, уключаючы Непал, Індыю, Шры-Ланку, Іарданію і Кенію, патрабавалі ад Масквы спыніць рэкрутынг і вярнуць іх грамадзян на радзіму.