Суд у ЗША абавязаў выдаліць імя Трампа з Цэнтра Кенэдзі

• 30.05.2026, 14:03

Палітык адрэагаваў.

Федэральны суд у Вашынгтоне пастанавіў выдаліць імя прэзідэнта ЗША Дональда Трампа з назвы Цэнтра выканальніцкіх мастацтваў імя Джона Кенэдзі, прызнаўшы незаконным рашэнне кіраўніцтва ўстановы пра яго перайменаванне.

Пра гэта піша The Guardian.

Акруговы суддзя Крыстафер Купер пастанавіў, што адміністрацыя Трампа павінна на працягу 14 дзён дэмантаваць усе шыльды з імем прэзідэнта і выдаліць згадкі пра «Мемарыяльны цэнтр выканальніцкіх мастацтваў Дональда Дж. Трампа і Джона Ф. Кенэдзі» з афіцыйных матэрыялаў.

У рашэнні суда адзначаецца, што назва Цэнтра Кенэдзі замацаваная федэральным законам і можа быць змененая толькі Кангрэсам. Суддзя прыйшоў да высновы, што рада ўстановы перавысіла свае паўнамоцтвы, калі ў аднабаковым парадку вырашыла дадаць імя Трампа да назвы культурнай установы.

Купер таксама часова заблакаваў планы па закрыцці Цэнтра Кенэдзі на час маштабнай рэканструкцыі. На яго думку, кіраўніцтва ўстановы не ўлічыла ўсіх наступстваў такога кроку для культурных праграм і мемарыяльнай місіі цэнтра.

У адказ Трамп заявіў, што будзе працаваць з Кангрэсам над перадачай цэнтра пад іншае кіраванне. Паводле яго слоў, ён не зацікаўлены ў далейшым удзеле ў праекце, калі не будзе мець магчымасці рэалізаваць уласнае бачанне рэфармавання ўстановы.

Іск у суд падала кангрэсвумен ад Дэмакратычнай партыі Джойс Біці, якая ўваходзіць у раду Цэнтра Кенэдзі. Яна вітала рашэнне суда, заявіўшы, што культурная ўстанова належыць амерыканскаму народу, а не асобным палітыкам.