Антысеміцкія акцыі ў Еўропе фінансаваў Крэмль

• 30.05.2026, 15:42

Расследаванне.

Расія арганізоўвала антысеміцкія атакі на Захадзе і ўкараняла схаваную сетку ўплыву ў Ізраілі. Пра гэта гаворыцца ў расследаванні OCCRP пры ўдзеле ізраільскага выдання Shomrim.

Дакументы сведчаць, што арганізатарам аперацый выступала высокапастаўленая крэмлёўская чыноўніца Сафія Захарава, якая вызначала іх мэту як стварэнне «кагнітыўных уразлівасцяў» у заходніх краін для іх аслаблення і дэстабілізацыі.

Ключавой задокументаванай акцыяй стала аперацыя з унутранай кодавой назвай «Зялёныя сінагогі»: Крэмль арганізаваў напад на сінагогу і мемарыял Халакосту ў Парыжы ў 2024 годзе. Для выканання аперацый у Заходняй Еўропе нанялі грамадзян Сербіі, якія аблілі зялёнай фарбай музей Халакосту і некалькі сінагог у Францыі, а каля Брандэнбургскай брамы ў Берліне, побач з мемарыялам ахвярам Халакосту, расклалі пластыкавыя свіныя галовы як наўмысную антысеміцкую правакацыю.

Выканаўцы былі затрыманыя, пазней суд у Парыжы канстатаваў, што мэтай акцый было «распальванне рэлігійнай і нацыянальнай нецярпімасці» паміж яўрэямі і мусульманамі, а таксама «дэстабілізацыя» Германіі і Францыі.

Паралельна РФ выбудоўвала агентурную сетку ўплыву ўнутры Ізраіля, гаворыцца ў расследаванні. Згодна з уцечкай, атачэнне Захаравай разам з расійскай PR-кампаніяй SDA распрацоўвала план стварэння ў Ізраілі фіктыўнага «даследчага інстытута», які наймаў бы мясцовых вучоных і інтэлектуалаў для фармавання патрэбных Крэмлю наратываў у грамадстве. Бюджэт першых шасці месяцаў працы структуры прадугледжваў $125 тыс., падбор трох ізраільскіх сузаснавальнікаў і арэнду офісаў у Хайфе. Сведчанняў таго, што інстытут быў фактычна створаны, у дакументах не прыводзіцца.