Дзярждэп ЗША ўхваліў продаж Украіне авіябомбаў JDAM

• 6.05.2026, 6:04

Галоўным падрадчыкам будзе Boeing.

Дзяржаўны дэпартамент ЗША ўхваліў магчымую здзелку па продажы Украіне боепрыпасаў-авіябомбаў Joint Direct Attack Munitions (JDAM) — на суму $373,6 млн.

Пра гэта 5 мая паведамляе агенцтва Reuters са спасылкай на заяву ведамства.

Пры гэтым галоўным падрадчыкам здзелкі выступіць карпарацыя Boeing, дадалі ў Дзяржаўным дэпартаменце ЗША.

Паводле Вікіпедыі, JDAM — авіябомбы, дадаткова абсталяваныя аэрадынамічным камплектам з навядзеннем па GPS, масай ад 230 да 960 кг і дальнасцю прымянення 40–75 км у апошняй мадыфікацыі JDAM-ER вытворчасці Boeing.

Акрамя таго, JDAM — гэта камплект з крылаў, што мацуюцца ў сярэдняй частцы бомбы, і хваставога блока з кіраваным апярэннем, якое дазваляе бомбе манеўраваць. Там жа змяшчаецца і камп'ютар з навігацыйным абсталяваннем.

Камплект JDAM выкарыстоўваецца для мадэрнізацыі некіраваных бомбаў калібру ад 230 кг (500 фунтаў — GBU-38) да 910 кг (2000 фунтаў — GBU-31).