Расія адмяніла парад 9 мая ў Крыме

• 6.05.2026, 8:21

Акупанты спалохаліся ўкраінскіх удараў.

Расійскія акупанты ў Крыме вырашылі не праводзіць ваенны парад і іншыя масавыя мерапрыемствы 9 мая.

Пра гэта паведамляе РБК-Украіна са спасылкай на заяву так званага «кіраўніка Крыму» Сяргея Аксёнава.

«Правядзенне ваеннага парада і іншых масавых мерапрыемстваў у гонар Дня Вялікай Перамогі ў Рэспубліцы Крым у гэтым годзе не плануецца. Таксама не адбудзецца арганізаванае шэсце «Несмяротнага палка», — адзначыў ён.

Аксёнаў растлумачыў, што такое рашэнне так званых «органаў улады» прадыктавана «меркаваннямі бяспекі».

Нагадаем, у канцы красавіка расійскі дыктатар Уладзімір Пуцін правёў размову з прэзідэнтам ЗША Дональдам Трампам, у якой заявіў, што гатовы ўстанавіць перамір’е з Украінай на «дзень перамогі».

У адказ Украіна заявіла, што Масква такім чынам хоча забяспечыць бяспеку свайго ваеннага параду, які запланаваны на 9 мая.