У Беларусі з'явіцца новая спецыяльнасць

• 6.05.2026, 11:54

Яе будуць навучаць у Гомелі.

Гомельскі дзяржаўны ўніверсітэт імя Францыска Скарыны ў гэтым годзе запускае новую спецыяльнасць «турызм і гасціннасць», паведамляе БелТА. Для рэгіёна гэта фактычна новы накірунак — паводле слоў рэктара Сяргея Хахомава, ніводзін універсітэт Гомельскай вобласці раней не рыхтаваў такіх спецыялістаў.

Рашэнне звязана з павышанай увагай дзяржавы да турыстычнай галіны.

Навучанне па новай спецыяльнасці будзе праходзіць на геолага-геаграфічным факультэце, у дзённай форме і працягнецца чатыры гады.

Праграма арыентаваная на практыку: студэнтам будуць выкладаць як базавыя дысцыпліны, так і сучасныя кірункі. Сярод іх — менеджмент у турызме, праца турагенцтваў і тураператараў, маркетынг і экскурсазнаўства.

Таксама курс уключае вывучэнне брэнд-менеджменту, рэкламы і PR, стартап-тэхналогій, прадпрымальніцтва, крэатыўных індустрый і арт-менеджменту.