Крэмль кідае курсантаў абараняць нафтабазы ад дронаў

• 6.05.2026, 12:54

«Дзіркі» ў расійскай СПА няма каму закрываць.

Курсантаў Пензенскага артылерыйскага інстытута ў Расіі плануюць прыцягваць да мабільных груп для аховы нафтабазаў і паліўных аб’ектаў ад атакаў беспілотнікаў. Прычынай называюць недахоп сіл СПА з-за росту ўдараў дронамі.

Пра гэта паведамілі ў партызанскім руху «АТЕШ», спасылаючыся на інфармацыю ад курсантаў расійскай вайсковай ВНУ.

Паводле звестак руху, расійскае камандаванне вымушана «латаць дзіркі» ў сістэме супрацьпаветранай абароны тымі, хто яшчэ не трапіў на фронт. Курсантаў плануюць уключаць у склад мабільных груп, якія будуць ахоўваць нафтабазы і іншыя паліўныя аб’екты на тэрыторыі РФ.

У «АТЕШ» заявілі, што стварылі асобны напрамак — «Курсантскі корпус АТЕШ» — для працы з курсантамі розных ваенных навучальных устаноў Расіі. Там сцвярджаюць, што курсанты, якія выходзяць на сувязь, перадаюць інфармацыю пра планы расійскага камандавання.

«Тыя, хто выходзіць на сувязь, перадаюць рэальную інфармацыю, якая дапамагае спыніць гэтую вайну», — гаворыцца ў паведамленні руху.

У «АТЕШ» таксама заявілі, што ўдары «знутры сістэмы» з’яўляюцца адным з самых эфектыўных спосабаў наблізіць завяршэнне вайны і захаваць жыцці.