Гендырэктар «Лабараторыі Касперскага» выступіў супраць Пуціна
- 6.05.2026, 13:45
Яўген Касперскі раскрытыкаваў абмежаванні інтэрнэту ў Расіі.
Гендырэктар «Лабараторыі Касперскага» Яўген Касперскі у інтэрв’ю часопісу «Эксперт» заявіў, што абмежаванні інтэрнэту ў Расіі негатыўна ўплываюць на бізнес. Ён таксама папярэдзіў, што інтэрнэт па сваёй важнасці параўнальны з электрычнасцю і з’яўляецца крытычнай інфраструктурай для дзяржавы і грамадства.
Спробы будаваць суверэнны інтэрнэт ён таксама не ацаніў. Бізнесмен лічыць, што пабудаваць падкантрольны краінам інтэрнэт будзе складана, а з пункту гледжання лагістыкі — немагчыма. «Вядома, калі вельмі захочацца цалкам адрэзаць сябе ад знешняга свету, можна перайсці і на папяровую пошту або факсы. Але на практыцы ў «жалезнай інтэрнэт-заслоне» заўсёды знойдуцца дзіркі. Нават у Паўночнай Карэі, якая лічыцца найбольш ізаляванай краінай, усё адно ёсць выхады ў інтэрнэт», — кажа Касперскі. Прадпрымальнік лічыць, што чыста тэхнічна пабудаваць цалкам суверэнную ІТ-інфраструктуру, уключаючы інтэрнэт, вельмі складана — патрэбныя камплектуючыя, абсталяванне, дата-цэнтры, кабелі, аптыка, праграмнае забеспячэнне і гэтак далей. Паводле яго слоў, ІТ-праекты ў Расіі тады застануцца без экспарту, не выжывуць або ў лепшым выпадку будуць цягнуць жаласнае існаванне.
Ён адзначае, што на яго бізнес паўплывалі абмежаванні, а галоўная нязручнасць была звязаная з цяжкасцямі камунікацыі праз звыклыя мэсэнджары, бо ў кампаніі 37 офісаў па ўсім свеце. Таксама заснавальнік антывіруса звярнуў увагу на сітуацыю з VPN і лічыць, што гэты інструмент памылкова ўспрымаюць. «Вось ужо гадоў 35, пачысціўшы зубы, сеўшы за камп’ютар працаваць, першай справай я ўключаю VPN. Сёння пра гэтую тэму шмат гавораць, але ў асноўным вельмі аднабакова. VPN створаны для таго, каб бяспечна злучаць аддаленыя адна ад адной часткі, напрыклад, адной і той жа кампаніі: каб супрацоўнікі, якія знаходзяцца ў Піцеры, Сан-Паулу, Ганконгу... У 2026 г. без VPN ніводзін больш-менш буйны бізнес працаваць не зможа!» — лічыць Касперскі.
Адключэнні інтэрнэту ў Расіі прыводзяць да прамых страт для бізнесу. Сталічны бізнес мог страціць да 5 млрд рублёў з-за адключэння інтэрнэту ў цэнтры Масквы ў перыяд з 6 па 10 сакавіка 2026 года. Найбольшы ўдар прыйшоўся на малы і сярэдні бізнес: кур’ерскія службы, таксі, каршэрынг і розніцу, якая працуе з POS-тэрміналамі. Чарговая хваля абмежаванняў чакаецца на перыяд майскіх святаў. 5 мая ў Маскве і Піцеры адбыліся часовыя абмежаванні мабільнай сувязі, адключэнні інтэрнэту і затрымкі SMS. Улады тлумачаць гэта мерамі бяспекі на фоне масавых мерапрыемстваў, прысвечаных 9 мая. У МТС паведамілі, што могуць узнікнуць складанасці з безнаяўнай аплатай, выкарыстаннем банкаматаў і геасэрвісаў, і парэкамендавалі карыстацца хатнім Wi‑Fi.