Вугоршчына вярнула Украіне пахішчаныя сродкі і золата «Ашчадбанка»

• 6.05.2026, 16:31

Праз два месяцы.

Будапешт у поўным аб'ёме вярнуў Кіеву сродкі і каштоўнасці «Ашчадбанка», якія захапілі вугорскія спецслужбы ў сакавіку гэтага года. Пра гэта паведаміў прэзідэнт Украіны Уладзімір Зяленскі у сацыяльных сетках

«Сёння былі вернутыя сродкі і каштоўнасці «Ашчадбанка», якія захапілі вугорскія спецслужбы ў сакавіку гэтага года, — напісаў ён. — Тады вугорскі бок неправамерна затрымаў украінскіх інкасатараў.

Людзей мы вярнулі хутчэй, а цяпер ужо на ўкраінскай тэрыторыі і сродкі, і каштоўнасці ў поўным аб'ёме».

Зяленскі таксама выказаў падзяку тым, хто «змагаўся за справядлівае рашэнне» і абараняў інтарэсы Украіны.

Нагадаем, у пачатку сакавіка Нацбанк Украіны паведаміў, што ўлады Вугоршчыны захапілі ўкраінскіх інкасатараў і буйную суму валюты.

З аўтамабіляў інкасатараў «Ашчадбанка» канфіскавалі 35 мільёнаў еўра і 40 мільёнаў долараў ЗША наяўнымі, а таксама 9 залатых зліткаў вагой па 1 кілаграму кожны.