Ва Украіне рыхтуюць закон пра «ваенныя кампаніі»

• 7.05.2026, 2:59

Пра гэта паведаміў Зяленскі.

Ва Украіне пачалі рыхтаваць заканадаўчую аснову для таго, што ў свеце прынята называць «ваеннымі кампаніямі».

Аб гэтым 6 мая ў вечаровым відэазвароце заявіў прэзідэнт Украіны Уладзімір Зяленскі.

«МУС Украіны, выведка, неабходныя ўрадавыя чыноўнікі, каманда Офіса Прэзідэнта рыхтуюць заканадаўчую аснову для таго, што ў свеце называюць „ваеннымі кампаніямі“. Я даручыў распрацаваць для Украіны найбольш аптымальны фармат і сёлета забяспечыць прыняцце закона. Вядучыя сусветныя дзяржавы прыцягваюць сваіх грамадзян да працы ў так званых прыватных ваенных кампаніях і ў некаторых іншых арганізацыйных формах», — сказаў кіраўнік украінскай дзяржавы.

Як лічыць прэзідэнт Зяленскі, «важна даць наш дзяржаўны адказ на гэтую нішу, на гэтую магчымасць, на гэты попыт у сферы экспарту бяспекі».

«Сёння адбылася нарада, прысвечаная некаторым асаблівым пасляваенным магчымасцям нашых воінаў. Увесь свет бачыць, што ўкраінскі воін сапраўды моцны і сапраўды вопытны. Наш экспарт бяспекі — пасля гэтай вайны і для ветэранаў — павінен стаць рэальнай бізнес-магчымасцю. Гэта правільна, гэта справядліва, каб наша дзяржава і надалей магла быць глабальным суб'ектам, каб украінскія воіны маглі зарабляць дзякуючы таму беспрэцэдэнтнаму досведу, які дала наша абарона», — падсумаваў кіраўнік украінскай дзяржавы.