Расія зноў пагражае замежным пасольствам ва Украіне

• 7.05.2026, 5:36

У Маскве баяцца ўдзелу Украіны ў парадзе.

У Міністэрстве замежных спраў Расіі заявілі, што накіравалі дыпламатычным місіям і міжнародным арганізацыям ноту з заклікам эвакуяваць персанал з Кіева з-за нібыта намераў Украіны нанесці ўдар па Маскве ў «свяшчэннае для ўсіх расіян свята» — Дзень Перамогі ў «Вялікай Айчыннай вайне».

Пра гэта паведаміла прэс-сакратар МЗС РФ Марыя Захарава.

«МЗС Расіі настойліва заклікае... забяспечыць загадзя эвакуацыю персаналу дыпламатычных і іншых прадстаўніцтваў, а таксама грамадзян у сувязі з непазбежнасцю нанясення Узброенымі сіламі РФ удару па Кіеве», — гаворыцца ў ноце.

У заяве таксама адзначана, што магчымыя ўдары могуць быць накіраваныя, у прыватнасці, па «цэнтрах прыняцця рашэнняў».

У МЗС Расіі заявілі, што папярэджанне варта ўспрымаць «сур'ёзна», і абвінавацілі заходнія краіны ў падтрымцы Украіны.

«Мы не выступаем з пазіцыі агрэсіі, мы выступаем з пазіцыі непазбежнага адказу на агрэсію», — заявіла Захарава.