Брэст чакаюць тры дні цвярозасці

• 7.05.2026, 8:19

Названы дні, калі нельга будзе набыць алкаголь.

Брэсцкі гарадскі выканаўчы камітэт прыняў рашэнне часова абмежаваць продаж алкаголю ў горадзе. Адпаведны дакумент №650 ад 17 красавіка апублікаваны на Нацыянальным прававым інтэрнэт-партале.

Згодна з рашэннем, рознічны продаж спіртнога будзе забаронены:

23 мая,

29 мая,

з 08:00 12 чэрвеня да 08:00 13 чэрвеня.

Як тлумачыцца, 23 і 29 мая абмежаванні ўводзяцца ў сувязі з мерапрыемствамі па прафілактыцы п’янства, а ў ноч з 12 на 13 чэрвеня — з-за правядзення школьных выпускных вечароў.

Пры гэтым забарона не закране ўстаноў грамадскага харчавання, а таксама продажу алкаголю для вяселляў і рытуальных мерапрыемстваў. Абмежаванні таксама не будуць дзейнічаць у крамах, размешчаных у пунктах пропуску праз дзяржаўную мяжу.