ЗША атакавалі іранскі танкер

• 7.05.2026, 9:21

Судна спыніла рух у бок Ірана.

Цэнтральнае камандаванне Узброеных сіл ЗША паведаміла ў сацыяльнай сетцы X, што амерыканскія вайскоўцы ў сераду спынілі і вывелі з ладу нафтавы танкер пад іранскім сцягам, які накіроўваўся ў бок аднаго з партоў Ірана.

Згодна з заявай камандавання, інцыдэнт адбыўся каля 09:00 па ўсходнім часе ЗША ў міжнародных водах Аманскага заліва. Танкер Hasna накіроўваўся да іранскага ўзбярэжжа.

У амерыканскім ваенным ведамстве сцвярджаюць, што экіпаж судна не адрэагаваў на неаднаразовыя папярэджанні. Пасля гэтага знішчальнік-бамбардзіроўшчык F/A-18 Super Hornet, які ўзляцеў з авіяносца USS Abraham Lincoln (CVN-72), адкрыў агонь з 20-міліметровай гарматы, пашкодзіўшы рулявое кіраванне танкера.

У Цэнтральным камандаванні ЗША заявілі, што пасля інцыдэнту судна спыніла рух у бок Ірана.