Пачобут распавёў пра свой стан пасля вызвалення

• 7.05.2026, 10:26

Журналіст паведаміў, што пасля турмы яму цяжка прывыкаць да свабоды.

Экс-палітвязень, журналіст Анджэй Пачобут, вызвалены ў выніку абмену 28 красавіка, у сацсетцы X распавёў пра свой стан.

«„Няма здаровых людзей — ёсць дрэнна абследаваныя“. Але ўсё лепш, чым я думаў. Я паступова прывыкаю да свабоды. Гэта зусім не так лёгка. Кожную ноч мне сніцца турма, а там жа начных кашмараў у мяне не было… цяпер дэманы раптам накінуліся на мяне. Што ж, такое жыццё», — напісаў Пачобут, апублікаваўшы фатаграфію з бальніцы.

Нагадаем, 28 красавіка 2026 года на польска-беларускай мяжы адбыўся абмен зняволенымі па формуле «пяць на пяць». Сярод тых, хто выйшаў на волю з беларускай калоніі, быў журналіст Анджэй Пачобут. За час зняволення ён страціў 20 кг.

У інтэрв'ю Gazeta Wyborcza экс-вязень распавядаў, што харчаванне ў калоніі яму абмяжоўвалі, асабліва падчас змяшчэння ў ШІЗА.