ГУР апублікавала звесткі пра танкеры і прозвішчы капітанаў ценявога флоту РФ

• 7.05.2026, 12:18

Украінская разведка папярэдзіла іх аб наступствах.

Галоўнае ўпраўленне разведкі Міністэрства абароны Украіны на партале War&Sanctions у раздзеле «Марскія судны» апублікавала звесткі пра 12 танкераў, якія выкарыстоўваюцца РФ для экспарту нафты і нафтапрадуктаў, і больш за 200 капітанаў, датычных да перавозкі грузаў ваеннага прызначэння і прадукцыі, вывезенай з часова акупаваных тэрыторый Украіны.

Прэс-служба ГУР надала інфармацыю пра дзесяць танкераў ценявога флоту РФ з фіктыўнымі сцягамі, з непразрыстай структурай уласнасці, а таксама пра два танкеры грэцкіх суднаходных кампаній. Яны абслугоўваюць інтарэсы найбуйнейшых расійскіх нафтагазавых карпарацый: «Сургутнефтегаз», «Роснефть», «Новатек», «Лукойл» і іншыя.

Такі экспарт з’яўляецца ключавой крыніцай папаўнення ваеннага бюджэту РФ. Большасць капітанаў і суднаў ужо знаходзяцца пад санкцыямі Украіны, аднак неабходная сінхранізацыя абмежаванняў з міжнароднымі партнёрамі, уключаючы забарону заходу суднаў у порты і адмову ў абслугоўванні.

Капітаны валодаюць поўнай інфармацыяй пра маршруты, кошт грузаў, тэхнічны стан суднаў і іх пагрозы для навакольнага асяроддзя. Яны свядома парушаюць міжнародныя правілы, маніпулююць сістэмай AIS і выкарыстоўваюць рызыкоўныя схемы перадачы грузаў.

Украінская разведка заклікала членаў экіпажаў адмовіцца ад удзелу ў незаконных дзеяннях, нагадаўшы, што ценявыя кампаніі-аператары знікаюць пры першых прыкметах расследавання, пакідаючы маракоў сам-насам з прававымі наступствамі.