У аэрапортах Масквы зноў калапс

• 7.05.2026, 21:16

Беспілотнікі адмянілі сотні рэйсаў.

У аэрапортах Масквы да сярэдзіны дня чацвярга, 7 мая, былі затрыманыя або адмененыя больш за 450 рэйсаў на фоне атак украінскіх беспілотнікаў на аб’екты расійскіх акупацыйных войскаў.

Як адзначае «Агентство», абмежаванні на прыём і вылет самалётаў уводзіліся паступова на працягу ночы і ранку. Спачатку абмежаванні закранулі Внуково і Шереметьево, затым меры распаўсюдзіліся на Домодедово.

Мэр Масквы Сяргей Сабянін паведамляў аб працы сістэм супрацьпаветранай абароны і «збітых беспілотніках» у паветранай прасторы рэгіёна.

Паводле даных анлайн-табло, у аэрапорце Внуково на працягу дня планавалася больш за 300 рэйсаў на вылет і прыбыццё. Частка рэйсаў была адмененая, частка — істотна затрыманая, што прывяло да назапашвання збояў у раскладзе.

Так, да 16 гадзін вылет 53 і прыбыццё 50 рэйсаў былі адмененыя, а вылет яшчэ 54 і прыбыццё 58 рэйсаў — затрыманыя.

У сацсетках публікуюцца шматлікія фота і відэа, на якіх паказана вялікае скупчэнне пасажыраў у залах чакання аэрапортаў расійскай сталіцы.