Ва Украіне рыхтуюць новую мадэль мабілізацыі і кантрактнай службы

• 9.05.2026, 21:29

Пра гэта заявіў Галоўнакамандуючы Узброенымі Сіламі Украіны.

Ва Украіне распрацоўваюць новыя фарматы кантрактнай службы і ўводзяць абавязковыя ратацыі для вайскоўцаў на фронце. Змены накіраваныя на паступовы пераход ад мабілізацыйнай да кантрактнай мадэлі камплектавання войска.

Пра гэта паведамляе РБК-Украіна са спасылкай на заяву галоўнакамандуючага Узброенымі Сіламі Украіны Аляксандра Сырскага.

Па яго словах, цяпер ідзе праца над рэалізацыяй ініцыятывы прэзідэнта Украіны Уладзіміра Зяленскага па пераходзе да кантрактнай мадэлі.

Сырскі ўжо паставіў задачу Генштабу падрыхтаваць канкрэтныя прапановы па новых фарматах такой службы.

- Асобную ўвагу надаем пытанням мабілізацыі і рэкрутынгу, - падкрэсліў ён.

Акрамя таго, ужо распрацавана і падпісана інструкцыя, якая рэгулюе тэрміны знаходжання байцоў на "нулі" - абавязковая змена вайскоўцаў на перадавых пазіцыях павінна адбыцца не пазней чым праз два месяцы знаходжання. Дадаткова прадугледжаны адзін месяц на ратацыю.

Сітуацыя на лініі судакранання застаецца складанай, бо праціўнік актывізаваў наступы амаль па ўсім фронце. Найбольш напружаным з'яўляецца Пакроўскі напрамак, дзе РФ сканцэнтравала каля 106 тысяч асабовага складу.

Нягледзячы на ціск, украінскія сілы працягваюць аперацыю ў Курскай вобласці і знясільваюць ворага. Паводле дадзеных Галоўнакамандуючага, штодня расійская армія страчвае не менш за тысячу вайскоўцаў забітымі і параненымі.

- Залог поспеху - менавіта ў актыўнай абароне і ініцыятыве на полі бою. Гэта дазваляе знясільваць праціўніка і аднаўляць пазіцыі, - падсумаваў Сырскі.

На працягу красавіка Сілы абароны ўзмацнілі ракетна-дронавы ціск на тылавыя аб'екты РФ.

Прыярытэтамі застаюцца нафтаперапрацоўка, лагістыка ПЗМ і прадпрыемствы ВПК. У прыватнасці, сродкамі Deep Strike было паражана 84 мэты ў глыбіні тэрыторыі Расіі.