Пад Гроднам разбіраюць чыгуначныя шляхі, якія вядуць у Літву

• 1.06.2026, 12:28

Калісьці па іх хадзілі цягнікі ў Друскінінкай.

Пад Гроднам разбіраюць чыгуначныя шляхі, якія вядуць з Беларусі ў Літву. Калісьці па іх хадзілі цягнікі наўпрост у курортны горад Друскінінкай. Фатаграфіямі працэсу дэмантажу падзяліўся чытач Onlíner.

— Разбіраюць чыгуначную ветку ад станцыі «Порэчча» да былога прыпыначнага пункта «Учитель» на мяжы з Літвой. 25 мая пераезд на месцы былога прыпыначнага пункта яшчэ быў. А 29 мая пераезд ужо разабралі, — расказаў чытач.

Прычына простая — непатрэбнасць. Справа ў тым, што міжнародны рух з Беларусі ў краіну-суседку спыніўся тут у пачатку двухтысячных. Праз некаторы час пасля гэтага на літоўскім баку чыгуначныя шляхі зраўнялі з зямлёй. А беларускія цягнікі яшчэ доўга хадзілі да прыпынку «Учитель» і назад. Але і іх у 2021 годзе адмянілі. Цяпер перастануць існаваць таксама і рэйкі са шпаламі.