У адным з пад'ездаў Мінска заўважылі людзей у ахоўных касцюмах

• 1.06.2026, 16:08

Стала вядома, што адбылося.

Беларусы ў сеціве абмяркоўваюць гісторыю аднаго мінскага пад'езда. Адзін з карыстальнікаў Threads апублікаваў фота, дзе бачна, як людзі ў ахоўных касцюмах выносяць пакеты з дому і складаюць іх у велізарны будаўнічы кантэйнер.

Праз нейкі час ён быў запоўнены даверху.

Карціна была даволі страшнай і спачатку выклікала толькі пытанні. У каментарыях нехта пажартаваў, што гэта проста прыбраліся ў пакоі падлетка, іншыя іранічна заяўлялі, што менавіта так будуць пераязджаць у іншую кватэру.

Але многія выказалі здагадку, што так ачышчалі кватэру чалавека, які доўгі час збіраў там «неабходныя», на яго погляд, рэчы.

«Чалавек памёр, у доме быў склад, або проста купілі кватэру з усім утварам, нанялі спецыялістаў прыбраць і вывезці хлам…» – агучылі адну з версій у каментарыях.

Часта людзей, якія займаюцца «збіральніцтвам» рэчаў, называюць плюшкінамі. Але калі задумацца, за гэтым можа стаяць і сур'ёзнае захворванне.

«Яны не плюшкіны, а сур'ёзна хворыя людзі. Дэменцыя, хвароба Альцгеймера... Чулі пра такое? Прычым на такую хваробу можна захварэць і ў 40», – падзяліўся меркаваннем адзін з карыстальнікаў.

Падрабязнасці расказалі ў адміністрацыі Фрунзенскага раёна выданню «Мінск-Навіны».

На фота трапіў дом 15 на вул. М. Лынькова. Высветлілася, што там толькі выконвалі рашэнне суда аб прымусовым прывядзенні адной з кватэр у належны санітарны стан.

Жыхароў не раз папярэджвалі, што ў кватэры трэба навесці парадак. Іх нават прыцягвалі да адміністрацыйнай адказнасці за парушэнне Правілаў карыстання жылымі памяшканнямі, утрымання жылых і дапаможных памяшканняў.

Самі жыхары выпраўляць сітуацыю не захацелі. Таму за справу ўзяліся камунальнікі разам з прадстаўнікамі аддзела прымусовага выканання Фрунзенскага раёна.

Яны вызвалілі кватэру ад хламу і старонніх рэчаў. Усё, што аказалася ў велізарным кантэйнеры, вывезлі на смеццявы палігон.