Псіхолагі патлумачылі, чаму людзі прывязваюцца да чат-ботаў

• 1.06.2026, 18:22

Разуменне гэтай асаблівасці важнае для развіцця ШІ.

Навукоўцы высветлілі, што эмацыйная сувязь людзей з чат-ботамі наўпрост звязаная з іх схільнасцю «ачалавечваць» тэхналогіі. Да такой высновы прыйшлі даследчыкі Універсітэта Брытанскай Калумбіі, вывучыўшы даныя больш за 1200 удзельнікаў, піша Psychology Today (пераклад — сайт Charter97.org).

Ідзе пра з'яву антрапамарфізму — тэндэнцыю прыпісваць тэхніцы чалавечыя якасці, такія як эмоцыі, намеры або жаданні. Напрыклад, калі карыстальнік кажа, што тэлефон «не хоча працаваць» або камп'ютар «думае», ён фактычна надае прыладзе чалавечыя рысы.

Даследаванне паказала, што людзі, якія часцей схільныя да такога ўспрыняцця, таксама лягчэй фармуюць эмацыйную і сацыяльную прывязанасць да чат-ботаў. Пры гэтым адрозненні паміж групамі значныя: маладыя людзі і мужчыны часцей усталёўваюць эмацыйны кантакт з ШІ, тады як пажылыя карыстальнікі і жанчыны робяць гэта радзей.

Навукоўцы адзначаюць, што падобная тэндэнцыя не новая і раней назіралася ў адносінах да жывёл, калі людзі таксама прыпісвалі ім чалавечыя эмоцыі і паводзіны.

Аўтары даследавання лічаць, што разуменне гэтай асаблівасці важнае для ацэнкі ўзаемадзеяння чалавека і штучнага інтэлекту. Паводле іх слоў, гэта можа дапамагчы распрацаваць падыходы да рэгулявання і змяншэння патэнцыйных рызык празмернай эмацыйнай залежнасці ад сістэм ШІ.