Ці можна ў Беларусі завяшчаць кватэру, якая яшчэ будуецца?

• 1.06.2026, 20:34

Адвакат патлумачыла.

Адвакат, загадчыца юрыдычнай кансультацыі Добрушскага раёна Вікторыя Раманчакова патлумачыла, ці дазволена ў Беларусі ўключыць у завяшчанне кватэру, якая яшчэ знаходзіцца на стадыі будаўніцтва. Паводле яе слоў, завяшчаць можна не толькі ўжо гатовую маёмасць, але і тую, якая з’явіцца ў чалавека ў будучыні.

Як паведамілі ў галоўным упраўленні юстыцыі Гомельскага аблвыканкама, пры засведчанні завяшчання натарыусу не трэба прадстаўляць праваўстанаўляючы дакумент на кватэру. То бок адсутнасць гатовага аб’екта нерухомасці не перашкаджае чалавеку загадзя распарадзіцца маёмасцю на выпадак смерці.

Склад спадчыны рэгулюецца артыкулам 1033 Грамадзянскага кодэкса Беларусі. У склад спадчыны можа ўваходзіць маёмасць, якая належала чалавеку на дзень адкрыцця спадчыны, а таксама маёмасныя правы і абавязкі.

Свабода завяшчання замацавана артыкулам 1041 Грамадзянскага кодэкса. Грамадзянін мае права завяшчаць усю сваю маёмасць або яе частку аднаму чалавеку або некалькім асобам.

Імі могуць быць як спадчыннікі па законе, так і асобы, якія ў гэты круг не ўваходзяць. Таксама маёмасць можна завяшчаць Рэспубліцы Беларусь або адміністрацыйна-тэрытарыяльным адзінкам.

Інакш кажучы, чалавек можа ўказаць у завяшчанні сваё дзіця як спадчынніка кватэры, якая яшчэ будуецца.

Пры наяўнасці завяшчання спадчыну атрымлівае той, хто ў ім пазначаны. Але ёсць выключэнне — абавязковая доля ў спадчыне.

Паводле артыкула 1064 Грамадзянскага кодэкса, права на такую долю маюць непаўналетнія або непрацаздольныя дзеці спадкодавца, а таксама яго непрацаздольныя муж (жонка) і бацькі. Яны атрымліваюць у спадчыну незалежна ад зместу завяшчання не менш за палову той долі, якая належала б ім пры спадкаванні па законе.

Да непрацаздольных паўналетніх асоб адносяцца пенсіянеры па ўзросце і інваліды I–III груп.

Калі такіх спадчыннікаў няма, дзіця, пазначанае ў завяшчанні, будзе адзіным спадчыннікам па завяшчанні.