У Баранавічах знайшлі яшчэ адзін «балівар»

• 15.06.2026, 10:00

Да мясцовага БПХО далучаць майстэрні па рамонце станкоў.

Баранавіцкае вытворчае баваўнянае аб’яднанне (БПХО) рашэннем канцэрна «Беллегпрам» прызначана мясцовым «баліваром», якому давядзецца «вынесці» дваіх, піша сайт «Беларусы і рынак».

Да аднаго з найбуйнейшых прадпрыемстваў горада далучаецца ўнітарнае прадпрыемства «Механічныя майстэрні». Яно спецыялізуецца, як сказана на афіцыйным сайце, на вырабе і рэстаўрацыі вырабаў і дэталяў машын з металу, рамонце і абслугоўванні абсталявання і сродкаў механізацыі. Яшчэ адзін накірунак — рамонтныя, кузаўныя і электрагазазварачныя працы аўтатранспартнай тэхнікі.

БПХО — як і раней адно з найбуйнейшых прадпрыемстваў Баранавіч і канцэрна «Беллегпрам». Але далёка не самае ўдалое ў фінансавым плане. Як заўважыў партал «Беларусы і рынак», у 2025 годзе тэкстыльшчыкі павялічылі выручку на 11% (да амаль 80 млн рублёў). Але пры гэтым чысты прыбытак аб’яднання скараціўся больш чым у 10 разоў (да каля 1,2 млн рублёў).

Як паказвае беларуская практыка, так любімы беларускімі ўладамі механізм выратавання праблемных прадпрыемстваў праз іх далучэнне да больш-менш паспяховых не вытрымліваюць нават значна больш паспяховыя за БПХО прадпрыемствы.

У 2025 годзе ў страты пайшлі квітнеючыя «Беллакт» і Лідскі малочна-кансервавы камбінат. А адбылося гэта пасля таго, як ім «перадалі» новыя актывы — адпаведна, Гродзенскі кансервавы завод і «Лідаспецаўтатранс».