З інтэрната беларусаў могуць выселіць «на вуліцу»

• 15.06.2026, 11:06

Выпадак у Мінску.

Атрымаць месца ў інтэрнаце (асабліва новага тыпу, дзе не пакоі і блокі, а паўнавартасныя кватэры) — мара многіх беларусаў. Аднак засяленне не азначае аўтаматычнага «замацавання» на месцы назаўсёды. Зніклі падставы для пражывання — будзь ласкавы — на выхад. І нават на самых упартых жыльцоў, якія не жадаюць з'язджаць з абжытых метраў, знойдзецца ўправа.

У суд з іскавай заявай звярнуліся прадстаўнікі аднаго з камунальных унітарных прадпрыемстваў, паведамляюць «Минск-Новости». Яны ўказалі, што іх арганізацыі належыць інтэрнат, размешчаны на вул. Брэсцкай. У сакавіку 2025 года на пасаду юрысконсульта ў гэтую арганізацыю ўладкаваўся адказчык, паміж бакамі быў заключаны дагавор найму жылога памяшкання ў інтэрнаце тэрмінам на 1 год.

Аднак літаральна праз паўгода, у лістападзе, юрысконсульт звольніўся з арганізацыі па пагадненні бакоў. Паколькі з ім былі спыненыя працоўныя адносіны, у сувязі з якімі і прадастаўлялася жылое памяшканне, прадстаўнікі КУП звярнуліся ў суд з патрабаваннем аб выселенні былога работніка. Па ўласнай волі той з «квадратаў» з'язджаць не хацеў.

— Адказчык на судовае пасяджэнне не з'явіўся, — пракаментавала старшая памочніца пракурора Кастрычніцкага раёна Вікторыя Літвінская. — Выслухаўшы прадстаўніка істца, даследаваўшы пісьмовыя матэрыялы справы, выслухаўшы меркаванне пракурора, які лічыў, што іск падлягае задавальненню, суд на падставе п. 1 арт. 61, арт. 64, п. 1 арт. 87 Жыллёвага кодэкса Рэспублікі Беларусь прыняў рашэнне аб выселенні адказчыка з інтэрната без прадастаўлення іншага жылога памяшкання.

Рашэнне суда раёна не абскарджана (не апратэставана) і ўступіла ў законную сілу.