У Беларусі хочуць забараніць курэнне яшчэ і каля пад'ездаў

• 15.06.2026, 13:15

А дзе ўжо забаронена курыць?

У Беларусі прапануюць увесці поўную забарону на курэнне каля ўваходаў у пад'езды жылых дамоў і інтэрнатаў. З такой ініцыятывай выступіў Рэспубліканскі цэнтр гігіены, эпідэміялогіі і грамадскага здароўя, перадае праўладны СТВ.

Цяпер забарона на курэнне дзейнічае ўжо ва многіх месцах, але праблема ў тым, што ў забароне ёсць спрэчныя моманты і няпраяснёныя сітуацыі.

У ліпені 2019 года ўступіў у сілу дэкрэт №2, які датычыцца пытанняў тытунёвага рэгулявання.

Катэгарычна забаронена курыць:

на працоўных месцах;

на станцыях метро, прыпынках грамадскага транспарту і ў самім грамадскім транспарце;

у ліфтах і дапаможных памяшканнях жылых аб'ектаў;

на дзіцячых пляцоўках і ў падземных пераходах;

у спартыўна-аздараўленчых і іншых лагерах;

на тэрыторыях устаноў адукацыі;

у прыватных аўто ў прысутнасці дзяцей да 14 гадоў;

на рынках;

у гандлёвых і аб'ектах грамадскага харчавання;

на летніх пляцоўках і пляжах;

на тэрыторыях арганізацый фізічнай культуры і спорту;

на тэрыторыях чыгуначных станцый, вакзалаў і аэрапортаў (за выключэннем спецыяльна абсталяваных для курэння месцаў);

а таксама ў любых іншых месцах, дзе размешчаны адпаведны знак, зацверджаны Міністэрствам аховы здароўя.

Міністэрства аховы здароўя само прызнавала: адзіным момантам, не адлюстраваным у новым антытытунёвым дакуменце, застаецца курэнне на балконах і лоджыях жылых дамоў. Паколькі яны адносяцца да тэрыторыі прыватнай уласнасці, юрыдычна забараніць курыць на іх нельга. Але і тут курцоў час ад часу штрафавалі, спасылаючыся на тое, што курца могуць убачыць іншыя людзі, у тым ліку дзеці, і гэта ўжо пасяганне на іх правы і свабоды.

У Мінску таксама дзейнічаюць зоны, цалкам свабодныя ад курэння:

пляжныя зоны Камсамольскага возера

пляжныя зоны Цнянскага вадасховішча

парк культуры і адпачынку імя Чалюскінцаў

Цэнтральны батанічны сад

парк імя Максіма Горкага

парк культуры і адпачынку імя 900-годдзя Мінска

Лошыцкі сядзібна-паркавы комплекс

парк імя 60-годдзя Вялікага Кастрычніка

Мінскі заапарк

пл. Незалежнасці і прылягаючыя да яе тэрыторыі.

Згодна з арт. 19.9 КаАП, курэнне і спажыванне тытунёвых вырабаў у забароненых месцах цягнуць за сабой штраф у памеры да чатырох базавых велічынь.

І вось цяпер ініцыятыва, якую актыўна абмяркоўваюць у Рэспубліканскім цэнтры гігіены і эпідэміялогіі, прадугледжвае распаўсюджанне бездымных зон на тэрыторыю каля пад'ездаў, дамоў і інтэрнатаў.