Самец беларускай рысі здзівіў вучоных

• 16.06.2026, 8:02

Сацыяльныя паводзіны гэтых жывёл больш развітыя, чым прынята лічыць.

Нядаўна беларускія заолагі зрабілі незвычайнае назіранне, піша тэлеграм-канал «Дзікая прырода побач».

Вучоныя сустрэлі рысь, якая ўскочыла на яліну ў двух метрах перад імі. Перш чым звер уцёк, заолагі паспелі апазнаць мясцовага самца Плямкача.

Але самае цікавае, што побач з гэтым месцам аказалася логава з двума маленькімі рысянятамі. Гэта азначае, што самец сядзеў у гэтым логаве з рысянятамі, пакуль маці адсутнічала.

Доўгі час у навуцы лічылася, што рысі — адзіночныя жывёлы і што самец не ўдзельнічае ў выхаванні патомства. Але гэты выпадак — пацвярджэнне таго, што сацыяльныя паводзіны рысей больш развітыя, чым прынята лічыць.