Сабакі таксама дзеляцца на левалапых і правалапых

• 17.06.2026, 11:12

І ёсць спосаб вызначыць іх вядучую лапу.

Ваш пёс аддае перавагу трымаць цацкі і рухаць міску левай лапай? Цалкам магчыма, што ён левалапы. Навукоўцы з Універсітэта Бары (Італія) распрацавалі методыку для вызначэння вядучай лапы сабакі, піша «Нож».

Іншыя даследаванні паказалі, што многія жывёлы ахвотней карыстаюцца адной з лап. Пры гэтым, калі верыць кінолагам, вызначыць вядучую лапу сабакі даволі складана. Аказваецца, падчас гульняў і адпачынку гадаванцы па чарзе выкарыстоўваюць усе канечнасці, і гаспадарам нялёгка разабрацца ў іх перавагах.

Італьянскія навукоўцы адаптавалі пад сабак тэст («Эдынбургскі апытальнік») для вызначэння вядучай рукі ў людзей. У эксперыменце ўдзел прынялі 43 хатнія гадаванцы розных парод і ўзростаў.

Тэст складаўся з некалькіх этапаў. Спачатку спецыялісты назіралі, якой лапай кожная сабака трымае цацку. Далей жывёлы павінны былі даставаць пачастункі, схаваныя пад мэбляй, і спускацца па лесвіцы, пакуль навукоўцы спрабавалі выявіць заканамернасці ў іх паводзінах.

Паводле вынікаў тэсту навукоўцы паспяхова вызначылі сабак — левалапых і правалапых, гадаванцаў без выразных пераваг і тых, хто актыўней выкарыстоўвае адзін бок цела. Згодна з высновамі аўтараў, гадаванцы з яскрава выяўленай «левалапасцю» або «правалапасцю» часцей маюць устойлівую псіхіку і лепш адаптуюцца да стрэсу.