У Расіі пад абстрэл трапіў аўтобус з дзіцячай футбольнай камандай з Гомеля

• 17.06.2026, 13:10

Параненні атрымалі шэсць чалавек.

Аўтобус з дзіцячай футбольнай камандай з Беларусі трапіў пад абстрэл дронаў. Пра гэта паведаміў часова выконваючы абавязкі губернатара Бранскай вобласці Ягор Кавальчук.

Паводле слоў расійскага чыноўніка, беспілотнік трапіў у аўтобус гомельскай дзіцячай футбольнай каманды, якая ехала на адпачынак у Геленджык. Адказнасць за тое, што адбылося, Кавальчук усклаў на ЗСУ.

Па яго словах, у выніку загінула жанчына, якая суправаджала каманду. Параненні атрымалі шэсць чалавек, у тым ліку чацвёра дзяцей.

«Усе пацярпелыя аператыўна дастаўлены ў бальніцу, дзе ім аказана неабходная медыцынская дапамога. Астатнія пасажыры ў бліжэйшы час будуць вернутыя дадому», — напісаў Ягор Кавальчук.

Украінскія крыніцы заявы в.а. губернатара Бранскай вобласці пакуль не каментавалі.

МЗС Беларусі праінфармаваны пра інцыдэнт у Бранскай вобласці, інфармацыя па здарэнні ўдакладняецца.