У Узбекістане перанеслі пачатак працоўнага дня з-за матчу зборнай на ЧС

• 17.06.2026, 19:01

Дзяржаўныя арганізацыі пачнуць сваю працу на дзве гадзіны пазней.

Працоўны дзень у Узбекістане 18 чэрвеня пачнецца на дзве гадзіны пазней — а 10-й гадзіне раніцы (08:00 па Мінску) — з-за матчу нацыянальнай зборнай на чэмпіянаце свету-2026, паведаміў прэс-сакратар кіраўніка дзяржавы Шэрзод Асадоў.

«Наш прэзідэнт будзе глядзець заўтрашні матч дома, са сваёй сям’ёй, са сваімі ўнукамі. Ён абвясціў, што 18 чэрвеня ўсе ўрадавыя арганізацыі пачнуць працу а 10-й гадзіне раніцы», — сказаў Асадоў.

Зборная ўпершыню ў сваёй гісторыі выступіць на чэмпіянаце свету. Першы матч на мундыялі зборная правядзе з Калумбіяй 18 чэрвеня а 05:00 па Мінску.

Каманда трапіла ў групу K, дзе таксама сустрэнецца з Партугаліяй (23 чэрвеня) і ДР Конга (28 чэрвеня).

Чэмпіянат свету ўпершыню праходзіць з удзелам 48 нацыянальных каманд на тэрыторыі трох краін — ЗША, Канады і Мексікі. Турнір завершыцца 19 ліпеня.