Расійскага трэнера «МЛ Віцебск» звольнілі за п'янства

• 17.06.2026, 19:37

Магамед Адыеў сістэматычна прагульваў трэніроўкі, а заняткі праводзілі ягоныя памочнікі.

Футбольны клуб «МЛ Віцебск» развітаўся з галоўным трэнерам Магамедам Адыевым праз ягонае злоўжыванне алкаголем, паведамляе «Трыбуна». Паводле звестак выдання, трэнер сістэматычна прагульваў трэніроўкі, а заняткі праводзілі ягоныя памочнікі.

У перыяд паўзы ў чэмпіянаце, звязанай з чэрвеньскімі матчамі зборных, Адыеў пачаў рэгулярна прапускаць трэніроўкі — паводле наяўных звестак, кожныя другія заняткі. Усю працу на сябе бралі асістэнты.

Гульцы не атрымлівалі ніякіх тлумачэнняў ні ад памочнікаў, ні ад самога галоўнага трэнера. Уладальнік клуба Арцём Леонаў, які наведвае трэніроўкі, асабіста гутарыў з Адыевым наконт прагулаў, аднак, ці ўдалося яму атрымаць тлумачэнні, не паведамляецца.

Акрамя дысцыплінарных праблем, паводле выдання, Леонаў быў незадаволены якасцю гульні каманды. Крыніцы сцвярджаюць, што трэнер і каманда хутка аддаліліся адзін ад аднаго, атмасферы адзінства ў калектыве не было. У апошніх матчах клуб дэманстраваў непераканаўчы футбол.

Паводле «Трыбуны», клуб тэрмінова шукае замену з трэнерскай ліцэнзіяй Pro. Прычына спешкі — старт кваліфікацыі Лігі чэмпіёнаў 7–8 ліпеня супраць румынскай «Універсітаті».

Пакуль абавязкі трэнера выконвае футбаліст «МЛ Віцебск» Сяргей Балановіч. Каманда 17 чэрвеня правядзе кубкавы матч супраць СКА-1938.