Макрон: Трамп заклікаў G7 заняць больш жорсткую пазіцыю, каб Украіна вярнула акупаваныя тэрыторыі

• 17.06.2026, 20:49

Краіны «Вялікай сямёркі» падтрымліваюць тэрытарыяльную цэласнасць Украіны.

Прэзідэнт Францыі Эмануэль Макрон заявіў, што прэзідэнт ЗША Дональд Трамп падчас саміту G7 заклікаў заняць больш жорсткую пазіцыю ў адносінах да Расіі, каб Украіна змагла вярнуць акупаваныя тэрыторыі.

Пра гэта ён заявіў у сераду, 17 чэрвеня, у кулуарах саміту G7.

Паводле Макрона, выніковая дэкларацыя саміту пацвярджае тэрытарыяльную цэласнасць Украіны і замацоўвае пазіцыю, згодна з якой менавіта Украіна павінна вызначаць падыход да тэрытарыяльных пытанняў.

«Калі б мы былі на месцы Украіны, мы б не дапусцілі, каб хтосьці іншы прымаў гэтае рашэнне за нас. І менавіта гэта мы падтрымалі — менавіта ўкраінцы будуць вырашаць пытанні, якія датычацца сваёй тэрыторыі. Але прэзідэнт Трамп таксама вельмі ясна сказаў, што нам трэба заняць значна больш жорсткую пазіцыю, і тэрыторыя павінна вярнуцца Украіне. І ён мае рацыю. Таму мы падтрымліваем цэласнасць украінскай тэрыторыі, і гэта пазіцыя G7», — сказаў французскі прэзідэнт.

Макрон дадаў, што Расія не дэманструе сапраўднай гатоўнасці да заканчэння вайны, а адмова дыктатара РФ Уладзіміра Пуціна прыехаць на перамовы толькі пацвярджае гэта.

«Мы ўсе заявілі, што намерваемся павялічыць нашу падтрымку Украіны. Мы ўсе заявілі, што будзем узмацняць ціск на Расію, і мы ўсе заявілі, што павінны ісці гэтым шляхам. І гэта сапраўдная змена. Гэта сапраўдная змена ў параўнанні з тым, што мы бачылі ў апошнія месяцы, не з боку Еўропы, а з боку членаў «Групы сямі» і ўсіх тых, хто пакліканы падтрымліваць Украіну», — падкрэсліў ён.

Паводле Макрона, саміт прадэманстраваў «карэнную змену падыходу, жаданне і волю з боку Злучаных Штатаў супрацоўнічаць з еўрапейцамі дзеля падтрымкі Украіны».