Зборная Партугаліі згуляла ўнічыю з ДР Конга на ЧС

• 17.06.2026, 22:09

Раналду не здолеў забіць брамніку, які завецца Ліянэль.

Футбалісты зборнай Партугаліі згулялі ўнічыю з камандай ДР Конга ў матчы першага тура групавога турніру чэмпіянату свету 2026 года. Сустрэча адбылася ў Х'юстане і завяршылася з лікам 1:1.

У партугальцаў гол забіў Жуан Нэвеш (6-я хвіліна). У складзе ДР Конга вызначыўся Ёан Віса (45+5).

Капітан партугальцаў Крышціяну Раналду выйшаў у стартавым складзе і стаў другім футбалістам у гісторыі, які згуляў на шасці чэмпіянатах свету. Першым на свой шосты ЧС напярэдадні выйшаў нападнік зборнай Аргенціны Ліянэль Месі.

41-гадовы Раналду таксама стаў найстарэйшым палявым гульцом у стартавым складзе ў гісторыі чэмпіянатаў свету. Нападнік правёў на полі ўсе 90 хвілін і не змог паразіць вароты брамніка, якога завуць Ліянэль Мпасі.

Зборная ДР Конга кваліфікавалася на чэмпіянат свету ўпершыню з 1974 года. Для каманды гэта другі ЧС у гісторыі. У 1974-м зборная (тады Заіра) прайграла тры матчы з розніцай забітых і прапушчаных галоў 0–14.

У групе К таксама выступаюць зборныя Узбекістана і Калумбіі, чый матч пачнецца 18 чэрвеня а 5:00 па Мінску.

У другім туры Партугалія 23 чэрвеня згуляе з Узбекістанам, ДР Конга — у ноч на 24 чэрвеня з Калумбіяй.