Масква больш не здаецца недасяжнай

• Аляксей Копыцько
• 19.06.2026, 16:22

Трэці ўдар за месяц.

1. Раніцай 18 чэрвеня СБУ разам з калегамі з Сіл спецыяльных аперацый, Сіл беспілотных сістэм, ГУР і 19-й ракетнай брыгады ВСУ звярнула ўвагу на маскоўскі рэгіён. У выніку ўсе назіралі эпічны палёт крышкі рэзервуара на Маскоўскім НПЗ. Дарэчы, усё сведчыць, што крышку сарвала ў выніку паспяховага траплення ракетай з ЗРПК «Панцыр-С1».

Ну, так нават лепш.

Відэа ўсе гартаюць другі дзень, дадатковыя каментары не патрэбныя. Адзінае, чаго не хапала для поўнага шчасця, — вецер быў не ў ідэальны бок. Вось калі б усю гэту нафтавую прыгажосць хоць бы дзянёк несла ў раён Крамля і Чырвонай плошчы, тады б атрымаўся стэрэаэфект.

Я імкнуся кансерватыўна ацэньваць шкоду да атрымання безагаворных пацвярджэнняў. У прыватнасці, апрыёры ігнарую заявы Reuters пра «спыненне працы» і гэтак далей. Бо ўсе ўдары яны асвятляюць па адной схеме: спасылка на расійскую крыніцу, якая сцвярджае, што ўсё жахліва. А потым НПЗ/порт раптам працуе.

Можна канстатаваць, што ў раёне МасНПЗ было як мінімум чатыры значныя загарэнні: два ў раёне рэзервуарнага парку і два на тэхналагічных пляцоўках… У любым выпадку, завод не знішчаны, там яшчэ ёсць чаму гарэць.

Але важна адзначыць першую «сістэму» — гэта трэці паспяховы візіт на Маскоўскі НПЗ за 30 сутак (17.05, 16.06, 18.06). Галоўнае — з нарастаючым вынікам. Гэта значыць, Сілы абароны Украіны на нейкі час намацалі падыход да абароны Масквы.

З абурэннем адкідваю ўсе падазрэнні ў тым, што расійскія вайскоўцы свядома прамахваліся або ўвогуле адмаўляліся збіваць украінскія БПЛА, быццам яны ненавідзяць масквічоў і хочуць заканчэння вайны. Такім думкам проста няма адкуль узяцца, ці не так?

2. Другая «сістэма» — чарговы паспяховы ўдар у момант важнай міжнароднай падзеі.

У нас некаторыя альтэрнатыўна адораныя персанажы любяць крычаць, што Расія актывізуе атакі, калі наш прэзідэнт едзе на міжнародныя сустрэчы. Карэляцыя тут, безумоўна, ёсць. Бо РФ стараецца стварыць максімальна дрэнны фон для перамоваў. Адстойваць пазіцыі складаней, калі ў краіне нешта маштабна гарыць і партнёры вагаюцца. Эмоцыі ўжо не тыя.

Аднак Украіна выйшла на ўзровень, калі ў гэтую гульню можна гуляць удваіх. І тройчы за месяц гэта даказала.

Першай ластаўкай стаў візіт добрых дронаў — ДВОЙЧЫ — да адкрыцця і закрыцця ПМЭФ у Санкт-Пецярбургу. Пуцін быў вымушаны нешта бурчаць пра задымленне на вугальным складзе здзіўленым замежным буржуінам.

Затым узбадзёрылі ўдзельнікаў саміту G7. Збіраліся яны на фоне пажару ў Кіева-Пячэрскай лаўры, а прыступілі да працы на фоне пажару ў Маскве. Што нельга ігнараваць.

Учорашні візіт у Маскву адбыўся на фоне саміту «Расія — АСЕАН» у трэцяй сталіцы РФ — Казані. Цяпер Пуцін павінен нешта бурчаць кіраўнікам дэлегацый Інданезіі, В’етнама, Філіпін, Малайзіі, Тайланда, Сінгапура, дзякаваць Лаосу за сланоў.

Усе гэтыя дзеячы могуць не паказваць сваёй рэакцыі, але Пуцін цудоўна ўсведамляе, як ён выглядае, распінаючыся пра супрацоўніцтва з амбіцыяй быць адным з полюсаў свету, калі ў яго літаральна гарыць сталіца.

«Дружышча, а ты часам не лузер?» — чытае ён у вачах візаві.

Любыя дамоўленасці будуць на горшых умовах для Расіі, калі ўвогуле будзе нейкая канкрэтыка.

3. Зноў падкрэслю. Крэмль, Мінбароны РФ, федэральныя СМІ і расблогеры актыўна распавядаюць, якую маштабную атаку адбіла Масква. Проста жах! Але ўпартны факт у тым, што паспяхова паражаныя мэты не толькі на маскоўскім напрамку.

То-бок, Украіна можа АДНАЧАСОВА дзейнічаць на некалькіх напрамках, цяпер ужо з магчымасцю праціснуць Маскву.

Па-першае, Крым і ўвогуле поўдзень. Але ў дэталях раскажуць тыя, хто павінен.

Па-другое, ССО паспяхова наведалі нафтабазу ў Гукоў (Растоўская вобласць). Ёсць відэа, карта NASA фіксуе буйны пажар.

Гэта параўнальна невялікае сховішча (восем рэзервуараў, 13 тыс. куб. м паліва). Аднак яно падключана да чыгуначнай веткі і знаходзіцца ў непасрэдным тыле акупацыйнай расійскай групоўкі. Максімальна зручна для манеўравання.

Трэба разумець, што аб’ём гэтага «параўнальна» невялікага сховішча — каля 175 чыгуначных цыстэрнаў паліва (3–3,5 паўнацённых эшалёны). З улікам таго, што ў Луганскай вобласці вораг вымушаны рассейваць цыстэрны парамі або драбніць аж да адзінкавай расстаноўкі, страта ў Гукоў нават двух з шасці рэзервуараў па 2 тыс. куб. м — гэта каля 50 цыстэрнаў (адзін эшалён), якія расіяне не змогуць назапасіць і перакінуць войскам.

Пакуль масквічы набываюць новыя ўражанні, на зямлі таксама ідзе руцінная праца. Цэнім усё.

Аляксей Копыцько, «Фэйсбук»