Расіян заманваюць на вайну вакансіямі «ў тыле СВА» ў Беларусі

• 2.06.2026, 16:48

Вербавальнікі абяцаюць службу без камандзіровак у «гарачыя кропкі».

Расіянам прапануюць заключыць кантракт на службу ў «тыле СВА» ў Беларусі або Кітаі. Адпаведныя аб'явы на «Avito» выявіла «Вёрстка».

Як мінімум шэсць працадаўцаў — «Военная Доблесть», «Путь к Победе», «Рубеж — Родины СВО», «Служба с достоинством», «Верный путь», «Армейский путь» — размясцілі ў маі ўжо каля 50 такіх вакансій. Фірмы з'явіліся на «Avito» з сакавіка па снежань 2025 года, іх рэквізіты і тэлефоны пацверджаныя платформай.

Аб'явы часта амаль даслоўна і па афармленні паўтараюць адна адну.

У вакансіях пазначана, што шукаюць людзей любога грамадзянства, у тым ліку «старэйшых за 45 гадоў», пенсіянераў і людзей «з парушэннямі здароўя» без досведу і вайсковага білета, але з пагашанай судзімасцю або з умоўным тэрмінам. Ім прапануюць, напрыклад, стаць ахоўнікамі складоў тыла ў Беларусі.

«Ніякіх камандзіровак у „гарачыя кропкі“ і лініі баявога сутыкнення. Чаму Беларусь: стабільная абстаноўка, развітая інфраструктура, блізкасць да дому для многіх грамадзян. Служба праходзіць на тэрыторыі Саюзнай дзяржавы з усімі гарантыямі і выплатамі ад Мінабароны РФ», — пішуць вербавальнікі.

Акрамя таго, у Беларусі і Кітаі шукаюць ахоўнікаў заводаў БПЛА, аб'ектаў РЭБ і палігонаў, вадзіцеля КамАЗа, аператара на завод па вытворчасці дронаў, зборшчыкаў, тэхнікаў і тэсціроўшчыкаў беспілотнікаў і гэтак далей.

Такі падман стаў асабліва папулярным з-за вялікай канкурэнцыі сярод вербавальнікаў, лічыць адзін з крыніц «Вёрсткі» ў маскоўскай мэрыі. Паводле яго слоў, галоўная мэта — заманіць чалавека ў ваенкамат.