«Раней быў конкурс ого-го-го, а цяпер бяруць усіх падрад»
- 20.06.2026, 13:15
Мінчанка прайшла першы этап кастынгу бортправадніц «Белавія» і расказала, як гэта было.
Мінчанка прайшла першы этап кастынгу бортправадніц «Белавія» і расказала ў сябе ў TikTok, «як гэта было». Яе відэа сабрала звыш 250 тысяч праглядаў і больш за 130 каментарыяў, піша «Зеркало».
Блогерка адзначыла, што для ўдзелу ў адборы неабходна зайсці на сайт «Белавія», запоўніць анкету і адаслаць рэзюмэ на электронную пошту. Заяўку разгледзяць і дашлюць кандыдатцы або кандыдату паведамленне з усёй неабходнай інфармацыяй: які дрэс-код, дзе і калі будзе праходзіць сумоўе, што трэба ўзяць з сабой.
Потым усе прэтэндэнткі і прэтэндэнты на пасаду збіраюцца ў офісе, пасля чаго іх па адным запрашаюць на сумоўе.
— Я прыходжу, перад мной сядзіць камісія, і яны пачынаюць задаваць цікавыя ім пытанні. Якія гэта пытанні? Па-першае, якая ў цябе адукацыя, дзе ты пражываеш, дзе вучышся… Мяне папрасілі расказаць што-небудзь па-англійску, некалькі слоў пра сябе. Гэткага было дастаткова. На гэтым, быццам, усё. Сумоўе ад сілы цягнулася хвілін пяць, таму нічога страшнага ў гэтым няма. Гэта толькі адборачны этап, — падзялілася мінчанка.
Яна дадала, што кастынг — гэта толькі пачатковы этап адбору. Пасля яго ідуць псіхалагічнае тэсціраванне, сумоўе на англійскай мове, размова з кіраўніцтвам і медкамісія.
— Прайшоўшы ўсе этапы, вас дапускаюць да навучання на бортправадніка, — расказала дзяўчына.
Яна дадала, што днямі атрымала «запаветнае паведамленне», у якім гаварылася:
«Паведамляю вам, што вы паспяхова прайшлі сумоўе на вакансію бортправадніка. У бліжэйшы час будзе ўзгодненая дата псіхалагічнага тэсціравання».
У другім роліку мінчанка расказала, якія патрабаванні выстаўляюцца да знешняга выгляду кандыдатак на пасаду бортправадніцы. Паводле слоў дзяўчыны, наймальнік патрабуе максімальна стрыманы макіяж, дзелавы стыль адзення і туфлі на невысокім абцасе.
«Раней быў конкурс ого-го-го, а цяпер бяруць усіх падрад»
Відэа мінчанкі выклікалі адгук у TikTok.
«Я таксама была на кастынгу, але мне сказалі, што ў іх дамоўленасць з кіраўніцтвам: не браць работнікаў аэрапорта», — падзялілася Karina_Alex30.
«Заўсёды перажываю за будучых бортправаднікаў, бо яны праходзяць у мяне доўгі шлях выдалення тату і з нецярпеннем чакаюць завяршэння. Уяўляю, якія ў вас адчуванні, калі прайшлі кастынг», — напісала карыстальніца з нікам udalenie.tatu.minsk.
«Я з чацвёртага класа марыла быць стюардэсай. Пасля першага палёту. Вучылася на перакладчыцу, але не прайшла медкамісію (з-за праблем з сэрцам. — Заўв. рэд.). Доўга перажывала, а потым зразумела, што гэта толькі абслуговы персанал, проста ў небе. Раней быў конкурс „ого-го-го“, а цяпер бяруць усіх падрад», — падключылася да дыскусіі azarnaya87.
«Поспехаў вам! Гэта мая неспраўдненая мара. 50 гадоў таму з сяброўкай адразу пасля школы пайшлі ў аэрапорт, нам было ўсяго 17 гадоў, сказалі прыйсці праз гадок, а праз гадок я выйшла замуж», — расказала belyanka.
Якія патрабаванні да кандыдатак і кандыдатаў
Патрабаванні да тых, хто жадае стаць бортправадніцамі і бортправаднікамі, пералічаныя на сайце «Белавіі»:
Кандыдат павінен мець вышэйшую адукацыю або быць навучэнцам вышэйшай навучальнай установы завочнай формы навучання (кандыдаты не могуць быць студэнтамі дзённай формы навучання);
Веданне англійскай мовы абавязковае на ўзроўні не ніжэй за Pre-Intermediate, а таксама ўменне прымяняць моўныя і маўленчыя навыкі ў працэсе абслугоўвання замежных пасажыраў і зносін з прадстаўнікамі розных службаў у транзітных аэрапортах;
Веданне кітайскай мовы вітаецца;
Наяўнасць дакумента ваеннага ўліку (для ваеннаабавязаных асоб);
Адсутнасць шкодных звычак, татуіровак на адкрытых частках цела і г.д.;
Жаданне працаваць у сферы абслугоўвання, дабразычлівасць, камунікабельнасць, энтузіязм, уменне працаваць у камандзе, адказнасць і дысцыплінаванасць.
Для працы бортправадніком не прымаюцца грамадзяне, якія маюць непагашаную або не знятую судзімасць за ўчыненне наўмыснага злачынства.