Венгрыя адмяніла ўведзеную пры Орбане забарону на ўкраінскія СМІ

• 20.06.2026, 13:44

У Будапешце заявілі пра курс на паляпшэнне адносін з Кіевам.

Новы ўрад Венгрыі адмяніў забарону на ўкраінскія СМІ, назваўшы рашэнне папярэдняй улады памылковым. У Будапешце заявілі пра курс на паляпшэнне адносін з Украінай і падтрымку ўкраінскай супольнасці.

Пра гэта на сваёй старонцы ў Facebook паведаміў міністр сацыяльных адносін і культуры Золтан Тарр.

Па яго словах, рашэнне было прынятае сумесна з Міністэрствам замежных спраў. Ён нагадаў, што забарона на ўкраінскія СМІ была ўведзеная ў 2025 годзе ў адказ на рашэнне Украіны абмежаваць дзейнасць асобных венгерскіх выданняў, якія, паводле ацэнкі Кіева, распаўсюджвалі расійскую прапаганду і парушалі журналісцкія стандарты.

У Будапешце назвалі блакіроўку памылкай

Тарр падкрэсліў, што нельга атаясамліваць незалежныя ўкраінскія СМІ са сродкамі масавай інфармацыі, якія распаўсюджваюць расійскую прапаганду.

Па яго словах, папярэдні ўрад выкарыстоўваў падобныя рашэнні для паглыблення палітычных супярэчнасцяў, тады як цяперашняя ўлада імкнецца палепшыць адносіны з Украінай і ўмацаваць добрасуседскае супрацоўніцтва.

Украінская супольнасць зноў атрымае доступ да СМІ

Пытанне аб адмене забароны было ўзгоднена з прадстаўніцай украінскай нацыянальнай меншасці ў Венгрыі Ліліянай Грэксай.

Пасля прыняцця рашэння яна адзначыла, што свабодны доступ да навін на ўкраінскай мове надзвычай важны як для ўкраінскай супольнасці, так і для бежанцаў, якія цяпер пражываюць у Венгрыі. Паводле прадстаўнікоў урада, гэты крок павінен стаць часткай палітыкі аднаўлення канструктыўнага дыялогу паміж Кіевам і Будапештам.