У Францыі ўвялі «сухі закон» з-за пагодных умоў

• 21.06.2026, 8:17

Краіну ахапіла анамальная спякота, якая б’е тэмпературныя рэкорды.

Францыя ўвяла забарону на ўжыванне алкаголю падчас мерапрыемстваў нацыянальнага музычнага фестывалю і на іншых публічных мерапрыемствах. Краіну ахапіла анамальная спякота, якая б’е тэмпературныя рэкорды.

Пра гэта паведамляе BBC.

Канцылярыя прэм’ер-міністра Себасцьяна Лекорню выдала спецыяльнае распараджэнне, якое датычыцца ўсіх афіцыйных публічных мерапрыемстваў на вуліцах. Ужыванне спіртнога ў грамадскіх месцах апынулася пад забаронай.

«Для ўсіх мерапрыемстваў, арганізаваных дзяржавай і яе ўстановамі, было дадзена распараджэнне не прапаноўваць алкаголь», — паведамілі ў ўрадзе.

Пад «сухі закон» трапіла штогадовае свята Fête de la Musique, якое звычайна прыцягвае на вуліцы мільёны людзей. Летась толькі ў Парыжы на святкаванне выйшлі каля двух мільёнаў чалавек. Аднак сёлета планы арганізатараў змяніла спякотнае надвор’е, і ўрад абвясціў чырвоны ўзровень небяспекі ў 35 дэпартаментах краіны.

Прагнозы сіноптыкаў несуцяшальныя: сёння, у нядзелю, тэмпература ў рэгіёне ад паўднёва-захаду да Бургундыі можа павысіцца да 40 градусаў. У некаторых раёнах — да 41 градуса.

Чыноўнікі хочуць разгрузіць бальніцы і службы выратавання. Абмежаванне продажу алкаголю дапаможа медыкам сканцэнтравацца на дапамозе ўразлівым групам насельніцтва.

Спякота ўжо паралізавала частку краіны:

скасаваныя дзясяткі цягнікоў з-за пагрозы дэфармацыі рэйкаў;

прыпыненыя заняткі ва многіх навучальных установах;

уведзены асаблівы рэжым працы для камунальных службаў.

Як Парыж ратуецца ад спякоты

Найбольш складаная сітуацыя чакаецца ў панядзелак, і мэрыя Парыжа ўвяла надзвычайныя меры. Паркі і сады сталіцы будуць адкрытыя кругласутачна, што дазволіць турыстам і гараджанам знайсці прахалоду ўначы. Чыноўнікі заклікаюць людзей пазбягаць прамых сонечных прамянёў і піць больш вады.