Вядомы японскі блогер-паліглот паспрабаваў загаварыць па-беларуску

• 21.06.2026, 16:10

Відэафакт.

Папулярны японскі блогер Юдзі, вядомы сваімі лінгвістычнымі чэленджамі ў Вене, выпусціў новы ролік. Хлопец падыходзіць да мінакоў, просіць іх сказаць нешта на роднай мове, а потым спрабуе адгадаць яе і падтрымаць размову.

На гэты раз яго суразмоўніцай стала дзяўчына, якую завуць Надзея. На просьбу блогера яна лаканічна адказала: «Прывітанне!». Юдзі не адразу зарыентаваўся і спачатку вырашыў, што гэта ўкраінская мова.

Надзея яго паправіла. З другой спробы японець беспамылкова вызначыў беларускую мову і захапіўся яе прыгажосцю, хоць сумленна прызнаўся, што ведае яе не вельмі добра.

Як высветлілася, Надзея жыве ў польскім Уроцлаве. Каб працягнуць дыялог, Юдзі перайшоў на сумесь польскай і англійскай і пацікавіўся ў суразмоўніцы яе любімым беларускім словам. Дзяўчына з усмешкай адказала: «Каханне!».