Украіна паразіла тры з пяці аўтамабільных паромаў на Керчанскай пераправе

• 21.06.2026, 20:22

На Крымскім мосце — калапс.

Украіна паразіла тры з пяці аўтамабільных паромаў на Керчанскай пераправе ў Крыме. Відэа з трыма палаючымі судамі апублікаваў украінскі маніторынгавы тэлеграм-канал Exilenova+.

Паводле звестак крыніцы, паромы былі паражаныя падчас атакі на порт «Каўказ», які цяпер таксама гарыць. Судзячы па афарбоўцы судоў, гэта менавіта аўтамабільныя паромы, піша «Агенцтва».

Улады Краснадарскага краю пацвердзілі атаку толькі на адзін аўтамабільны паром. Аднак уся пераправа з сённяшняга дня зачыненая. Чыноўнікі параілі выкарыстоўваць для праезду ў Крым сухапутны маршрут праз анексаваныя тэрыторыі Украіны, які з пачатку мая знаходзіцца пад інтэнсіўнымі абстрэламі ўкраінскіх вайскоўцаў.

Тым часам на Крымскім мосце, які застаўся адной з нямногіх дарог на матэрык, утварыўся велізарны затор на 700 аўтамабіляў. На ўезд у Крым чаргі няма.