Развеяны папулярны сярод беларускіх рыбаловаў міф

• 22.06.2026, 13:01

Навуковыя дадзеныя яго абвяргаюць.

Некаторыя беларускія спінінгісты ўлетку заўважаюць, што ў шчупакоў бракуе часткі зубоў. Гэта можа навесці на думку, што рыба дрэнна клюе менавіта з гэтай прычыны.

Аднак гэтае меркаванне памылковае. Спецыялісты далі тлумачэнні, іх каментар прыводзіць партал fishingby.com.

Навукоўцы патлумачылі, што шчупак звычайны (Esox lucius) мае поліфіадонтную зубную сістэму. Гэта азначае, што зубы ў гэтай рыбы пастаянна і шматразова абнаўляюцца.

Гэта эвалюцыйны механізм, які робіць яе ідэальным драпежнікам на працягу ўсяго жыцця.

Біёлаг Рычард Херольд, які вывучаў гэтае пытанне з дапамогай гісталагічных метадаў і электроннай мікраскопіі, даказаў, што працэс абнаўлення зубоў у шчупакоў ідзе бесперапынна.

Новы зуб пачынае расці яшчэ да таго, як выпадзе стары. Таму лунка ніколі доўга не пустуе: пасля выпадзення зуба яго месца даволі хутка займае ўжо сфармаваная замена.

Эксперты прыйшлі да высновы, што ў шчупака не існуе канкрэтнага перыяду, калі адначасова мяняюцца ўсе зубы. Адпаведна, рыба не страчвае здольнасці паляваць і здабываць ежу.

Навуковыя дадзеныя не пацвярджаюць уплыву змены зубоў на інтэнсіўнасць клёву.

А адсутнасць асобных зубоў (звычайна ікол) у канкрэтнага асобніка — усяго толькі індывідуальная анатамічная асаблівасць, а не прыкмета сезоннай хваробы.

Чаму ж тады не клюе

Ёсць іншыя рэальныя прычыны зніжэння актыўнасці драпежніка.

На гэта могуць уплываць такія фактары, як змяненне тэмпературы вады і ўзроўню кіслароду ў ёй, атмасфернага ціску і іншых пагодных умоў.

Іншыя прычыны могуць быць звязаныя з кармавой базай і часам сутак.