У Гомельскай вобласці завяршаецца будаўніцтва некаторых аб’ектаў новага вайсковага гарадка
- 22.06.2026, 16:00
Прааналізаваны спадарожнікавыя здымкі і закупы кампаній.
Шэраг аб’ектаў вайсковага гарадка Сіл спецыяльных аперацый у раёне вёскі Прыбор Гомельскага раёна, які будуецца, ужо мае высокую ступень гатоўнасці. Гэта высветліў «Флагшток» , прааналізаваўшы спадарожнікавыя здымкі і закупы кампаній, што займаюцца будаўніцтвам.
У тэндэрах не раскрываюць падрабязнасцяў будаўніцтва, а сам вайсковы гарадок зашыфраваны пад назвамі «аб’ект №115 па ГП» і «аб’ект будаўніцтва ГП №115». У закупах нічога не сведчыць пра тое, што гэта вайсковы аб’ект, але дзякуючы аналізу тэндэраў «Флагшток» пераканаўся, што гаворка ідзе менавіта пра вайсковы гарадок каля Прыбора.
Заказчыкам работ з’яўляецца Гомельскі дамабудаўнічы камбінат, а выканаўцам — прыватнае будаўнічае прадпрыемства «СПЫНУ» са Жлобіна.
Апошні абвешчаны Гомельскім ДСК тэндэр на выкананне работ па ўзвядзенні аб’екта датуецца лістападам 2025 года — на суму больш за 13,7 млн рублёў (амаль 5 млн долараў па актуальным курсе). Падрабязнасцяў у закупе практычна няма, але пазначана, што работы павінны быць выкананыя да сярэдзіны ліпеня 2026 года.
Пра тое, што гэтыя тэрміны выконваюцца, сведчаць закупы, якія нядаўна правяло прадпрыемства «СПЫНУ». У канцы мая яно закупляла вокны, вітражы і дзверы для «аб’екта будаўніцтва ГП №115», у пачатку чэрвеня — сістэму гучнагаварнога апавяшчэння, а ў канцы чэрвеня — і мультымедыйнае абсталяванне. Апошняе павінна быць пастаўлена да канца жніўня 2026 года, што сведчыць, што да гэтага часу і будаўнічыя, і аздобныя работы павінны быць завершаныя.
Разам з тым, іншых тэндэраў, напрыклад для аснашчэння казармаў ложкамі і іншымі прадметамі, пакуль не абвешчана. Гэта азначае, што будаўніцтва іншых аб’ектаў гарадка пакуль працягваецца.
Пра гэта ж сведчаць і спадарожнікавыя здымкі. На момант іх абнаўлення (20 чэрвеня 2026 года) бачна, што на аб’екце вядзецца актыўнае будаўніцтва. Прыкметна, што будаўнікі не робяць адрознення паміж чэргамі аб’екта і забудоўваюць тэрыторыю раўнамерна (вайсковы гарадок, першая і трэцяя чаргі будаўніцтва паводле публічнай кадастравай карты).
Найбольш высокую ступень гатоўнасці дэманструюць зоны размяшчэння гаражоў і складоў. Па спадарожнікавай здымцы нізкага дазволу Sentinel Hub можна зрабіць выснову пра высокую гатоўнасць аб’ектаў. Будынкі, верагодна, ужо пад дахамі, вакол іх прыкметныя бетонныя праезды.
Здымка таксама фіксуе мноства будынкаў адміністрацыйна-гаспадарчага прызначэння ў паўднёва-ўсходняй частцы вайсковага гарадка. З-за іх меншага памеру пра іх гатоўнасць казаць складана, тэрыторыя вакол іх яшчэ не мае завершаных праездаў.
Цяпер прыкметныя абрысы 3 з 9 будынкаў казармаў і будынка штаба паміж імі. Яны знаходзяцца на розных стадыях будаўніцтва.
Верагодна, на дадзены момант завершана фармаванне вучэбна-тактычнага поля — абшырнай пляцоўкі ў лесе ўсходней ад вайсковага гарадка. За апошні месяц на аб’екце праводзіліся мінімальныя высечкі, якія ўдакладняюць складаную канфігурацыю трэнавальнай пляцоўкі.
Як раней паведамляў «Флагшток», да канца сакавіка 2026 года на тэрыторыі вайсковага гарадка павінна было быць завершана будаўніцтва сталовай на 680 пасадачных месцаў, а яшчэ раней — вайсковай лазні і электрападстанцыі.
Чакаецца, што работы па ўзвядзенні гарадка будуць весціся яшчэ як мінімум да 2028 года. Нагадаем, Дзяржаўная інвестыцыйная праграма прадугледжвае ў 2026 годзе выдзяленне 64 млн рублёў на прадаўжэнне будаўніцтва. Значна большыя сумы прадугледжаны на наступныя гады: 200 млн руб. у 2027 годзе і 341,8 млн руб. у 2028 годзе.