У ЗША «звольнілі» робата-паліцэйскага

• 23.06.2026, 4:00

Ён не зафіксаваў ніводнага парушэння.

У горадзе Дублін (штат Агаё, ЗША) паліцыя датэрмінова спыніла эксплуатацыю робатызаванага «афіцэра», які павінен быў дапамагаць праваахоўнікам у патруляванні. Аб гэтым 20 чэрвеня паведаміў партал Daily Star.

За амаль год працы робат не зафіксаваў ніводнага правапарушэння, не выпісаў штрафаў і не спрыяў ніводнаму затрыманню, што не задаволіла праваахоўнікаў.

Ідзе гаворка пра аўтаномнага робата пад назвай DubBot. Яго кошт складаў прыблізна $128 тыс., хаця пасля частковай кампенсацыі фактычныя выдаткі горада склалі каля $67,5 тыс.

Робат абсталяваны 360-градуснымі камерамі, сістэмай двухбаковай сувязі для надзвычайных выклікаў, а таксама мог перадаваць святлавыя і гукавыя сігналы. Нягледзячы на гэта, паводле даных СМІ, DubBot не прадставіў ніякай інфармацыі, якая прывяла б да затрыманняў.

Робата «ўзялі на працу» ў межах пілотнай праграмы. Пры гэтым ад далейшага разгортвання аналагічных робатаў у горадзе адмовіліся.

Праект ужо стаў прадметам крытыкі з боку мясцовых жыхароў і каментатараў, якія называюць яго неэфектыўнай тратай сродкаў.