Украіна атрымае першы транш з 90-мільярднага крэдыту ад ЕС

• 25.06.2026, 18:01

На вытворчасць дронаў.

Кіраўніца Еўракамісіі Урсула фон дэр Ляен падчас адкрыцця канферэнцыі па пытаннях аднаўлення Украіны ў Гданьску ў чацвер паведаміла пра выдзяленне Украіне першага траншу макрафінансавай дапамогі на суму 3,2 млрд еўра з крэдыту на 90 млрд еўра і анансавала выдзяленне сродкаў на вытворчасць дронаў, піша «Еўрапейская праўда».

«Сёння мы пералічваем першы транш гэтага крэдыту (на 90 млрд еўра. — Рэд.), гэта 3,2 млрд еўра макрафінансавай дапамогі. Я рада абвясціць пра гэта выдзяленне сродкаў сёння», — сказала яна.

Паводле слоў кіраўніцы ЕК, з пачатку поўнамаштабнага ўварвання ЕС і дзяржавы-члены аказалі Украіне каля 200 млрд еўра дапамогі

Таксама яна паведаміла, што ў бліжэйшыя дні ЕС пачне пералічваць Украіне сродкі з пакета на 6 млрд еўра, прызначаныя для вытворчасці дронаў. «Гэта сапраўды салідарнасць у дзеянні», — канстатавала фон дэр Ляен.