Украінскія дроны атакавалі Керч: у раёне пераправы прагрымелі выбухі

• 26.06.2026, 11:28

Удар таксама нанесены па мясцовым аэрадроме.

У ноч на 26 чэрвеня беспілотнікі атакавалі часова акупаваны Крым. Серыя выбухаў была чутная ў раёне Керчы, БПЛА фіксаваліся паблізу Керчанскай паромнай пераправы. Пра гэта паведамляюць мясцовыя Telegram-каналы і маніторынгавыя сэрвісы.

Пасля серыі выбухаў жыхары Керчы паведамілі пра моцны пах гару, які адчуваўся ў горадзе.

Па стане на раніцу афіцыйнай інфармацыі пра наступствы атакі, магчымыя пашкоджанні ці пацярпелых не паступала. Маніторынгавыя рэсурсы працягваюць адсочваць сітуацыю на часова акупаваным паўвостраве.

Сэрвіс NASA FIRMS таксама фіксуе пажар у раёне дыслакацыі сродкаў СПА «Панцыр С-1» і аэрадрома.