Z-блогер расакрэціў ключавую праблему акупантаў

• 26.06.2026, 16:27

Украінцам удаецца і далей эфектыўна выбіваць лагістыку расійцаў.

Расійскі Z-блогер Андрэй Філатаў заявіў, што сітуацыя для расійскіх вайскоўцаў на фронце кардынальна змянілася ў горшы бок. Пра гэта піша «Дыялог» са спасылкай на эфір расійскіх прапагандыстаў.

Сёння адной з галоўных пагроз для акупантаў становіцца ўжо не сам штурм, а працэс перамяшчэння да месца выканання баявой задачы.

Па словах Філатва, расійскія падраздзяленні сутыкаюцца з сур'ёзнымі праблемамі яшчэ на этапе высоўвання, што ўплывае на агульную эфектыўнасць дзеянняў і вядзе да страт. Прычына — сістэматычнае нарошчванне Украінай удараў беспілотнікамі.

«Цяпер ужо нават штурм часам не такі страшны, як дабрацца проста да пункта канцэнтрацыі і высоўвання на баявую пазіцыю», — сказаў ён.

Філатаў таксама адзначыў, што, па ягонай ацэнцы, у расійскіх падраздзяленняў узнікаюць складанасці з арганізацыяй працы беспілотнікаў і размеркаваннем рэсурсаў. Паралельна ўкраінцам удаецца і далей эфектыўна выбіваць лагістыку, і цяпер гэтая кампанія прыводзіць да катастрафічных праблем для Узброеных Сіл РФ.