Журналісту Кірылу Пазняку і яго дачцэ прысудзілі турэмныя тэрміны

• 26.06.2026, 17:43

Бацьку і дачку абвінавацілі па двух артыкулах.

26 чэрвеня Мінскі гарадскі суд вынес прысуды журналісту Кірылу Пазняку і яго дачцэ Яніне. Пра гэта са сваіх крыніц даведаўся тэлеканал «Белсат».

Кірыла Пазняка прыгаварылі да пазбаўлення волі на тры з паловай года, столькі ж прасіла для яго і абвінавачванне. Пакуль дакладна невядома, колькі давядзецца правесці за кратамі яго дачцэ Яніне, але для яе прасілі тры гады.

Акрамя таго, Кірыл Пазняк павінен заплаціць штраф у 550 базавых велічынь (24 750 рублёў). Якую суму павінна заплаціць яго дачка, пакуль невядома.

Бацьку і дачку абвінавацілі па двух артыкулах — 361‑1 і 369‑1 Крымінальнага кодэкса Беларусі — у стварэнні экстрэмісцкага фарміравання і дыскрэдытацыі Рэспублікі Беларусь.

Кірыл Пазняк быў затрыманы 4 верасня 2025 года. Тады КДБ абвясціў «экстрэмісцкім фарміраваннем» YouTube-канал «Платформа 375», а журналіста назваў «арганізатарам» гэтага «фарміравання». У той жа дзень, паведамлялі праваабаронцы, затрымалі і 20‑гадовую дачку Кірыла Пазняка — Яніну Пазняк.

Разгляд справы Пазнякоў пачаўся 17 чэрвеня. Першае судовае пасяджэнне было прызначанае на 14 мая, але з-за цяжкага стану здароўя журналіста яго давялося перанесці. У ізалятары на вуліцы Акрэсціна Кірыл Пазняк перанёс COVID-19 і цяжкую пнеўманію, якая дала ўскладненні на лёгкія. Некалькі дзён ён правёў на апараце штучнага дыхання. Кірыл праходзіў лячэнне ў турэмным шпіталі.

Пакуль прысуд не ўступіць у сілу, Кірыл Пазняк і яго дачка Яніна будуць знаходзіцца ў следчым ізалятары. Тэрмін утрымання пад вартай падчас следства суд залічыў як дзень за паўтара.