Пасол Беларусі ў Расіі скардзіцца на праблемы з продажам нашых тавараў

• 26.06.2026, 18:06

Рэжым не можа прадаваць у РФ аўтамабілі «БелДжы».

У гандлі з Расіяй ёсць праблемы, а некаторыя расійскія праекты проста перашкаджаюць прасоўваць беларускую прадукцыю на рынку РФ. Пра гэта заявіў пасол Беларусі ў Расіі Юрый Селіверстаў.

Напрыклад, беларускія заводы не могуць удзельнічаць у расійскіх праграмах імпартазамяшчэння, бо там патрабуецца пэўны ўзровень лакалізацыі вытворчасці. Ад гэтага, напрыклад, пацярпеў завод «БелДжы», які выпускае аўтамабілі, — яму перакрылі выхад на расійскі рынак таксі.

«Увядзенне патрабаванняў да аўтамабіляў для таксі-перавозак з сакавіка бягучага года фактычна адрэзала беларускі завод «БелДжы» ад гэтага важнага сегмента рынку. Прымаюцца і іншыя меры, накіраваныя на так званае «абяленне» эканомікі, якія, з аднаго боку, абараняюць наш рынак ад недабрасумленнай канкурэнцыі з трэціх краін, аднак з другога — ствараюць перашкоды для беларускіх экспарцёраў», — перадае БелТА нараканні дыпламата.

Таксама Селіверстаў паскардзіўся, што ў Расіі запускаюць шэраг буйных праектаў, аналагічных беларускім: «Ствараюцца сумнеўныя вытворчасці з нізкай лакалізацыяй, якія па сутнасці з'яўляюцца схаванымі каналамі імпарту з трэціх краін. У сувязі з гэтым неабходна накіраваць нашы сумесныя намаганні найперш на развіццё і мадэрнізацыю дзеючых прадпрыемстваў — вытворцаў той прадукцыі, аб'ёмаў якой недастаткова ў «саюзнай дзяржаве», а не на стварэнне новых дублюючых, а часта і лішніх вытворчасцей».