Адбылося 16 выбухаў: у Крыме гарыць Сакская ЦЭЦ

• 28.06.2026, 14:09

Пажар паступова разрастаецца.

У ноч на нядзелю, 28 чэрвеня, у горадзе Сакі ў часова акупаваным Крыме чуліся выбухі. Пра гэта паведамляе праўкраінскі OSINT-канал «Крымскі вецер».

Пад атакой апынулася мясцовая ЦЭЦ. На працягу гадзіны сведкі зафіксавалі 16 выбухаў з зарэвам, таксама назіралася задымленне.

Сакская ЦЭЦ гарыць пасля прылётаў, пазней паведаміла маніторынгавая група «Крымскага ветру» са спасылкай на даныя спадарожнікавай здымкі.

Пажар адзначаецца ў раёне рэзервуараў з палівам.

Пад раніцу пажар на Сакскай ЦЭЦ узмацніўся. Даныя спадарожнікавай здымкі паказваюць павелічэнне плошчы цеплавых сігнатур.

Электрычная магутнасць Сакскай цеплаэлектрацэнтралі складае 149,4 МВт, цеплавая магутнасць — 138 Гкал/гадз. ЦЭЦ з’яўляецца асноўным вытворцам цеплавой энергіі ў Саках.

Тым часам расійскае Мінабароны заявіла пра нібыта збітыя на працягу ночы 213 украінскіх беспілотных лятальных апаратаў самалётнага тыпу.